Qazaqstan Reseıde sottalǵan manıakty elimizde jazasyn óteý úshin qabyldaýdan bas tartty - I. Merkel

ASTANA. QazAqparat - Qazaqstan Reseıde sottalǵan manıakty elimizde jazasyn óteý úshin qabyldaýdan bas tartty. Bul týraly búgin Parlament Májilisiniń jalpy otyrysynda Bas prokýrordyń orynbasary Iogan Merkel málim etti. Eske salsaq, jalpy otyrysta «Qazaqstan Respýblıkasy men Italııa Respýblıkasy arasyndaǵy sottalǵan adamdardy berý týraly shartty ratıfıkatsııalaý týraly» zań jobasy maquldanǵan bolatyn.

«Jaqynda ǵana biz Reseıde sottalǵan azamatymyzdy qabyldaýdan bas tarttyq. Ol birqatar jynystyq sıpattaǵy aýyr qylmystary úshin sottalǵan edi. Shyndyǵynda, ol naǵyz jeńsikqumar manıak, 24 jylǵa sottalǵan bolatyn», - dedi Bas prokýror orynbasary depýtattar saýalyna jaýap bere otyryp. Onyń aıtýynsha, mundaı sheshim negizinen álgindeı manıaktyń elimizde jazasyn ótep, keıin bostandyqqa shyǵýy elimizdiń ulttyq múddelerine qaıshy keletindikten qabyldanyp otyr. «Sosyn eger óz Otanynda jazasyn óteý týraly sottalýshy ótinish jasap, al oǵan Qazaqstanda taǵaıyndalatyn jaza jeńildeý bolsa, onda da sottalǵandar úshin bas tartylady», - deıdi I. Merkel.