Qazaqstan Reseıde endaýment-qorlardy damytý tájirıbesin tanystyrdy
ASTANA. KAZINFORM — Sankt-Peterbýrg qalasynda Reseıdiń Ulttyq endaýmentter qaýymdastyǵy uıymdastyrǵan «Vechnye vklady» assambleıasy ótti. Bul — endaýment-qorlardy damytý jáne qaıyrymdylyq mádenıetin ilgeriletý salasyndaǵy eń iri is-sharalardyń biri.
Ǵylym jáne joǵary bilim mınıstrligi baspasóz qyzmetiniń málimetinshe, ol jyl saıyn Reseı men basqa da elderden kelgen 100-den astam uıymdy, sonyń ishinde ýnıversıtetterdi, qaıyrymdylyq qorlaryn, sondaı-aq bıznes-qoǵamdastyq pen qarjy naryǵynyń ókilderin biriktiredi.
QR Ǵylym jáne joǵary bilim mınıstrligi atynan forým qatysýshylaryn delegatsııa jetekshisi Mıra Tursynbaeva quttyqtap, elimizdegi endaýment-qorlardyń damýy jáne olardyń ǵylym men ýnıversıtettik bilim berýdi transformatsııalaýdaǵy róli týraly baıandady.
Plenarlyq sessııanyń mańyzdy nátıjeleriniń biri — Qazaqstannyń Ulttyq endaýment-qorlar qaýymdastyǵy men Reseıdiń Ulttyq endaýmentter qaýymdastyǵy arasyndaǵy yntymaqtastyq týraly memorandýmǵa qol qoıylýy boldy. Qujatqa Qazaqstannyń Ulttyq endaýment-qorlar qaýymdastyǵynyń basqarma tóraǵasy Farhad Qýanǵanov pen Reseıdiń Ulttyq endaýmentter qaýymdastyǵynyń basqarma tóraıymy Svetlana Lavrova qol qoıdy.
Forýmnyń negizgi baǵyttarynyń biri — endaýment-qorlardy damytýdaǵy qazaqstandyq tájirıbeni talqylaý boldy. Qazaqstandaǵy endaýment-qorlardy damytýǵa arnalǵan arnaıy sessııa barysynda qatysýshylar 2025 jyly «Nysanaly kapıtal qorlary jáne endaýment-qorlar týraly» zańnyń qabyldanýynan keıin osy baǵyttyń damý perspektıvalaryna erekshe qyzyǵýshylyq tanytty.
Trekti «Avrora-Ala» QQ atqarýshy dırektory Evgenıı Mohovıkov júrgizdi. Sarapshylar retinde Mıra Tursynbaeva, Farhad Qýanǵanov, Tımýr Makenov jáne «Standard» ınvestıtsııalyq kompanııasy AQ basqarýshy dırektory Sanjar Seıitqasymov sóz sóıledi.
Qatysýshylardyń erekshe qyzyǵýshylyǵyn «Study in Kazakhstan» ekspozıtsııasy týdyrdy. Qazaqstanda sheteldik stýdentterge arnalǵan jańa bilim berý múmkindikteri men akademııalyq utqyrlyq bastamalaryn S. J. Asfendııarov atyndaǵy Qazaq ulttyq medıtsına ýnıversıteti, Astana International University, Q.Qulajanov atyndaǵy Qazaq tehnologııa jáne bıznes ýnıversıteti, Astana medıtsına ýnıversıteti tanystyrdy.
Forým jumysy fandraızıng pen endaýmentterdegi tsıfrlyq qarjy men tsıfrlyq aktıvterge arnalǵan jabyq saraptamalyq sessııamen aıaqtaldy. Sessııa aıasynda qaıyrymdylyq naryǵynyń bolashaq stsenarıılerin modeldeýge arnalǵan strategııalyq oıyn ótkizildi, oǵan qazaqstandyq Standard jáne Freedom Broker basqarýshy kompanııalary da qatysty.
«Vechnye vklady» assambleıasyna qatysý Qazaqstan úshin áleýmettik salany turaqty qarjylandyrýdyń jańa tetikterin damytýdaǵy ǵana emes, sondaı-aq álemniń jetekshi ýnıversıtetteriniń ozyq tájirıbelerine sáıkes ǵylym men joǵary bilimdi jańǵyrtýdaǵy eleýli ilgerileýdi halyqaralyq deńgeıde moıyndatýdaǵy mańyzdy qadam boldy.
Buǵan deıin habarlanǵandaı, JOO-larda kapıtaly 50 mlrd teńge bolatyn 5 endaýment qor qurylady.
