Qazaqstan Reseı jáne Frantsııamen áskerı yntymaqtastyq máselesin talqylady
NUR-SULTAN. QazAqparat - Qazaqstan Reseı jáne Frantsııa Respýblıkalarymen áskerı yntymaqtastyq máselelerin talqylady. Bul týraly QR Qorǵanys mınıstrliginen málim etti, dep habarlaıdy QazAqparat.
Qorǵanys mınıstrliginde vedomstvo basshysynyń orynbasary general-leıtenant Talǵat Muhtarov Frantsııa Qorǵanys mınıstrligi Halyqaralyq qarym-qatynastar bas basqarmasynyń Óńirlik máseleler jónindegi departamentiniń bastyǵy general-leıtenant Fılıpp Býtınomen kezdesti.
«Taraptar qorǵanys salasyndaǵy áskerı yntymaqtastyq máseleleri men bolashaq baǵyttardy talqylady. Odan basqa, elordadaǵy sapar aıasynda sheteldik meımandar úshin QR Tuńǵysh Prezıdenti - Elbasy atyndaǵy Ulttyq qorǵanys ýnıversıteti men Ulttyq áskerı-patrıottyq ortalyqtyń Áskerı-tarıhı mýzeıine tanystyrý ekskýrsııasy uıymdastyryldy», - delingen resmı aqparatta.
Sondaı-aq Astanadaǵy QR Tuńǵysh Prezıdenti - Elbasy atyndaǵy Ulttyq qorǵanys ýnıversıtetinde Qazaqstan men Reseı arasyndaǵy yntymaqtastyqtyń jaı-kúıi men keleshegi máseleleri talqylandy.
Ýnıversıtet bastyǵy general-polkovnık Sáken Jasuzaqov Reseı Federaldyq Jınalysy Federatsııa Keńesiniń halyqaralyq ister, sondaı-aq qorǵanys jáne qaýipsizdik komıtetteriniń tóraǵalary Konstantın Kosachev pen Vıktor Bondarevpen kezdesti.
«Taraptar Qazaqstan men Reseı arasyndaǵy yntymaqtastyqtyń jaı-kúıi men keleshegi máselelerin, sondaı-aq kıberqaýipsizdik aıasyndaǵy ózara is-qımyldyń bolashaq baǵyttaryn talqylady. Odan basqa, sapar aıasynda sheteldik qonaqtar tyńdaýshylarǵa dáris oqydy jáne Sırııadaǵy halyqaralyq terrorızmmen kúresýde Reseı Qarýly Kúshteriniń qol jetkizgen nátıjeleri men tájirıbesi týraly qulaǵdar etti», - dedi mınıstrlikten.
