Qazaqstan Reseı jáne Belarýspen kedendik baj salyǵy boıynsha ózgeristi qarastyrady
ASTANA. KAZINFORM – Parlament Májilisiniń qaraýyna «2014 jylǵy 29 mamyrdaǵy Eýrazııalyq ekonomıkalyq odaq týraly shartqa EAEO-ǵa múshe memleketterdiń arasynda kedendik ákelý bajdarynyń somalaryn aýdarýǵa qatysty bólikte ózgerister engizý týraly hattamany ratıfıkatsııalaý týraly» zań jobasy kelip tústi.
Atalǵan zań jobasy Májiliske 2024 jylǵy 4 tamyzda Úkimet qaýlysymen engizildi.
«Kedendik ákelý bajdarynyń somalaryn esepke alý men bólý jáne olardy EAEO-ǵa múshe memleketterdiń bıýdjetterine aýdarý tártibi týraly hattama Eýrazııalyq ekonomıkalyq odaqqa múshe memleketterdiń ulttyq bankteriniń qarsy mindettemeleriniń somalaryn aýdarý mehanızmin aıqyndaıdy. Sonymen birge, 2022 jyldan bastap Reseı Federatsııasy AQSh dollaryndaǵy qarsy mindettemeler boıynsha esep aıyrysýlardy toqtatty (EAEO týraly shart aıasynda). Bul turǵyda osy Hattamaǵa ýaqytsha mehanızmdi anyqtaýǵa qatysty ózgerister engizilip otyr. Oǵan sáıkes Reseı Federatsııasymen jáne Belarýs Respýblıkasymen esep aıyrysý kezinde ortalyq bankter arasyndaǵy qarsy mindettemelerdegi aıyrma soma reseılik rýblmen aýdarylady», - dedi Májilistiń Qarjy jáne bıýdjet komıtetiniń tóraǵasy Tatıana Saveleva.
Onyń aıtýynsha, atalǵan ózgeristerdi engizý EAEO-ǵa múshe memleketterdiń bıýdjetterine kedendik bajdy turaqty aýdarýdy qamtamasyz etedi.
«Qarjy jáne bıýdjet komıteti osy zań jobasy boıynsha qorytyndy ázirleýge daıyn», - dedi depýtat.
