Qazaqstan, Reseı jáne Belarýs temir joldary arasynda korporatıvtik kelisim jasaldy
Máskeýde «Qazaqstan temir joly» UK» AQ, «Rossııskıe jeleznye dorogı» AAQ jáne «Belarýsskaıa jeleznaıa doroga» MB arasynda «Birlesken kóliktik-logıstıkalyq kompanııalar - Eýrazııalyq temirjol alıansyna» (BKLK ERA) qatysty Aktsıonerlik kelisimge (korporatıvtik kelisim) qol qoıyldy.
Qujatqa «Qazaqstan temir joly» UK» AQ basqarma tóraǵasy Saýat Myńbaev, «RTJ» AAQ bas dırektory Oleg Belozerov jáne Belarýs temir jolynyń basshysy Vladımır Morozov qol qoıdy.
«Aktsıonerlik qoǵam Eýrazııalyq ekonomıkalyq odaq (EAEO) aýmaǵy arqyly tranzıttik tasymaldy ıntegratsııalaýdy jalǵastyrýda Belarýs, Reseı jáne Qazaqstan temir joldarynyń nıetterin qýattaıdy. Korporatıvtik kelisim «BKLK ERA» AQ aktsııalar paketine qatysty taraptardyń qatystylyǵy mindetteri men quqyqtaryn reglamentteıdi. Úsh aktsıonerdiń bári de teńdeı daýysqa ıe. Óıtkeni aktsııalar «QTJ» UK» AQ, «RJD» AAQ jáne «Belarýs temir joldary» MB arasynda teńdeı - 33,33% bólingen», - dedi Qazaqstan temir joly kompanııasynan.
Qol qoıylǵan qujat qoǵam men aktsııalar aınalymyn basqarýmen baılanysty máselelerdiń keń spektrin qamtıdy. Kelisim basqarý sheshimderin qabyldaý protsesinde janjaldyq jaǵdaılardy sheshý tetikterin, Dırektorlar keńesi tóraǵasynyń laýazymyn almastyrý tártibin, dıvıdenttik saıasattyń jańa erejelerin aıqyndaıdy.
«BKLK-ny birlese júzege asyrý eýrazııalyq ekonomıkalyq ıntegratsııany damytý protsesine úles qosý bolyp tabylady. Іs-áreketterimizdi kelisý, tyǵyz úılestirýdi qamtamasyz etý mańyzdy», - dep atap kórsetti Saýat Myńbaev.
BKLK ERA qyzmeti Qytaı - Eýropa - Qytaı baǵytyndaǵy tranzıttik konteınerlik tasymaldardy damytýǵa baǵyttalǵan. 2015 jyly joba sheńberinde bul baǵytpen 47,6 myń JFE tasymaldansa, al 2018 jyly - shamamen 280 myń JFE. Bıylǵy josparda tasymal kóleminiń ósimi qarastyrylǵan.
