Qazaqstan, Reseı jáne Belarýs azamattyq qorǵaý salasyndaǵy yntymaqtastyqty damytý máselelerin talqylady

ASTANA. KAZINFORM — Irkýtsk qalasynda Qazaqstan, Reseı jáne Belarýs tótenshe jaǵdaılar vedomstvolarynyń XII birlesken alqa otyrysy ótti. Qazaqstan delegatsııasyn Tótenshe jaǵdaılar mınıstri Shyńǵys Árinov bastap bardy, dep habarlaıdy vedomstvonyń resmı saıty. 

Otyrysta basty nazar azamattyq qorǵaý salasyndaǵy úshjaqty yntymaqtastyqty damytý máselelerine aýdaryldy.

Shyńǵys Árinov kólik pen sý obektilerindegi qaýipsizdik máselelerine, sondaı-aq tótenshe jaǵdaılarǵa den qoıý boıynsha biryńǵaı tásilderdi ázirleý qajettiligine erekshe kóńil bóldi.

Otyrys qorytyndysy boıynsha kelesi jylǵa arnalǵan birlesken is-sharalar jospary bekitildi. Josparǵa halyqaralyq oqý-jattyǵýlar, praktıkalyq semınarlar jáne qutqarýshylar arasyndaǵy jarystar engizildi, bul kásibı baılanystardy nyǵaıtyp, tótenshe jaǵdaılarǵa den qoıý daıyndyǵy deńgeıin kóterýge múmkindik beredi.

Alqanyń kelesi otyrysy 2026 jyly Belarýste ótedi. Onda taraptar azamattyq qorǵaý salasyndaǵy birlesken jobalardy talqylaýdy jalǵastyrady.

— Irkýtsk oblysyna jumys sapary barysynda Qazaqstan delegatsııasy Uly Otan soǵysy jyldarynda qaza bolǵandardy eske alý maqsatynda «Máńgilik alaý» memorıalyna gúl shoqtaryn qoıdy. Bul mándi shara tarıhı estelikterdi saqtaýdyń jáne baýyrlas halyq arasyndaǵy myzǵymas dostyq baılanystardyń mańyzdylyǵyn aıqyndap kórsetti, — delingen habarlamada.

Aıta keteıik, buǵan deıin Shyǵys Qazaqstan oblysynyń qutqarýshylaryna jańa tehnıkalar tabystalǵany týraly jarııaladyq.