Qazaqstan-Reseı Úkimetaralyq komıssııasynyń otyrysynda qandaı máseleler qaraldy
ASTANA. KAZINFORM - Máskeýde ótken Qazaqstan Respýblıkasy men Reseı Federatsııasy arasyndaǵy 25-shi Úkimetaralyq komıssııa otyrysynda ekijaqty yntymaqtastyqtyń ózekti máseleleri talqylandy, dep habarlaıdy Úkimettiń baspasóz qyzmeti.
Qazaqstannyń úkimettik delegatsııasyn Qazaqstan Respýblıkasy Premer-mınıstriniń orynbasary Serik Jumanǵarın, Reseı tarapyn Reseı Federatsııasy Premer-mınıstriniń orynbasary Alekseı Overchýk basqardy.
Taraptar transporttyq-logıstıka salasynda yntymaqtastyqty belsendi túrde damytýda. 2024 jyldaǵy 9 aıdyń qorytyndysy boıynsha, Qazaqstan men Reseı temir joldary birlesken jumysynyń nátıjesinde, konteınerlerdiń Reseıden Qazaqstan arqyly Qytaıǵa tasymaldaý kólemi 63%-ǵa, al Reseı men Qazaqstan aýmaǵy arqyly «Qytaı – Eýropa – Qytaı» baǵytyndaǵy tasymaldar 2023 jyldyń sáıkes kezeńimen salystyrǵanda 65%-ǵa artty.
Atalǵan otyrysta taraptar konteınerlik poıyzdardyń «Qytaı – Qazaqstan – Reseı» baǵyty boıynsha júk aǵynyn arttyrý úshin Selıatıno stansasyna jaqyn jerden transport ınfraqurylymyn salý máselesin pysyqtaýǵa kelisim jasady. Bul stansada bıyl sáýir aıynda Sıan (Qytaı) – Dostyq/Altynkól (Qazaqstan) – Selıatıno (Reseı) marshrýty boıynsha júk tasymaldaýdy barynsha tıimdi júzege asyrýǵa baǵyttalǵan CRK Terminal zamanaýı transporttyq-logıstıka ortalyǵyn qurý jobasy iske qosyldy. Bul ortalyq halyqaralyq transport dálizderiniń damýyna mańyzdy úles qosyp, Qazaqstan arqyly tranzıttik tasymaldardyń básekege qabilettiligin arttyrady.
Úkimetaralyq komıssııa otyrysy barysynda Qazaqstan tarapy Reseı jaǵynan otandyq karantınge jatqyzylǵan ónimder ımportyna shekteýler engizý máselesin kóterdi. Taraptar jaǵdaıdy sheshý joldaryn jedel ázirleý úshin ýákiletti memlekettik organdar arasynda ekijaqty konsýltatsııalar ótkizýge kelisti.
Kezdesý barysynda ekijaqty yntymaqtastyqtyń saýda-ekonomıkalyq, ónerkásip, energetıka, transport, qarjy, mádenıet, ǵylym, bilim jáne týrızm salalaryndaǵy nátıjeleri de qaraldy.
2024 jyldyń qańtar-tamyz aılarynda Qazaqstan men Reseı arasyndaǵy saýda aınalymy $17,2 mlrd-ty qurady.
Osyǵan deıin Premer-mınıstr Oljas Bektenovtiń Májilis depýtaty Baqytjan Bazarbektiń Qurylys kodeksiniń jobasyn ázirleý kezinde zańsyzdyqtarǵa jol berilgeni týraly saýalyna jaýaby týraly jazdyq.
