Qazaqstan-Reseı tranzıtindegi ýaqyttyń jartysy shekaradaǵy protsedýralarǵa ketedi – Jumanǵarın

ASTANA. QazAqparat – Qazaqstan – Reseı óńiraralyq yntymaqtastyq forýmynyń XVIII jalpy otyrysynda QR Premer-Mınıstriniń orynbasary – Saýda jáne ıntegratsııa mınıstri Serik Jumanǵarın shekaradaǵy ákimshilik kedergilerdiń ózara qarym-qatynasqa tıgizip jatqan zııany týraly aıtty, dep habarlaıdy QazAqparat tilshisi.

«Kólik dáliziniń tabysty damýyna birqatar ınfraqurylymdyq jáne fızıkalyq emes sıpattaǵy problemalar kedergi keltirip otyr. Búginde sarapshylar osyndaı 40-tan astam kedergini atap júr. Saldarynan tranzıt ýaqytynyń shamamen 50 paıyzy shekarany kesip ótýge – ákimshilik protsedýralarǵa ketip jatyr. Osylaısha avtotasymal men temirjol tasymalynyń uzaqtyǵyn eki ese arttyrýda», - dedi vıtse-premer.

Aıtýynsha, atalǵan urymtal tustardy joıý úshin birinshi kezekte «jumsaq» ınfraqurylymdy jolǵa qoıý kerek.

«Jekelep aıtsaq, shekaradaǵy júk aınalymy protsesin tsıfrlandyrý, keden protsedýralaryn úndestirý, úılestirilgen tarıf saıasatyn engizý qajet. Bul úshin ınfraqurylym shekteýleri men ákimshilik kedergilerdi alyp tastaýǵa, tasymaldaýshylarǵa qolaıly jaǵdaı jasaýǵa jáne ınfraqurylymdy damytatyn ınvestıtsııa tartýǵa arnalǵan birlesken jol kartasyn qabyldaý usynylady», - dedi Serik Jumanǵarın.

Aıta keteıik, atalmysh sharanyń ashylýyna Memleket basshysy Qasym-Jomart Toqaev Reseı astanasynan beınekonferentsııa formatynda qatysty.