Qazaqstan-Reseı taýar aınalymy 3%-ǵa ósip, $27,8 mlrd-qa jýyqtady
ASTANA. KAZINFORM – Oljas Bektenov RF Úkimeti tóraǵasynyń orynbasary – Úkimet Apparatynyń basshysy Dmıtrıı Grıgorenkomen kezdesý ótkizdi, dep habarlaıdy QR Premer-mınıstriniń baspasóz qyzmeti.
QR Premer-mınıstri Oljas Bektenov Reseı Federatsııasy Úkimeti tóraǵasynyń orynbasary – Úkimet Apparatynyń basshysy Dmıtrıı Grıgorenkomen kezdesý ótkizdi.
Tsıfrlandyrý jáne jasandy ıntellekt, ınvestıtsııalar, ınnovatsııalyq damý salasyndaǵy birqatar máseleler talqylandy.
Memleket basshylary deńgeıinde qol jetkizilgen ýaǵdalastyqtardy iske asyrý barysyna nazar aýdaryldy.
Qazaqstan Prezıdenti Qasym-Jomart Toqaev pen Reseı prezıdenti Vladımır Pýtınniń turaqty baılanystarynyń nátıjesinde ekijaqty ózara is-qımyl deńgeıi joǵary qarqynmen jalǵasyp jatyr.
2024 jyldyń qorytyndysy boıynsha ózara taýar aınalymynyń kólemi shamamen 3%-ǵa ósip, $27,8 mlrd-ty qurady. Bul rette ári qaraı saýda-ekonomıkalyq jáne ınvestıtsııalyq yntymaqtastyq úshin aıtarlyqtaı áleýet bar. Kezdesýge qatysýshylar jasandy ıntellektini qoldanýshylardyń qarqyndy ósip kele jatqanyn aıtyp, tsıfrlandyrý salasyndaǵy ekijaqty áriptestik qatynastardyń mańyzdylyǵyn atap ótti.
Jańa tehnologııalardy engizý úderisterinde kúsh-jigerdi biriktirý ınnovatsııalardy damytýǵa, IT-kásipkerler men startap-jobalardy qoldaý sharalaryn qalyptastyrýǵa, bilikti mamandardy daıarlaýǵa, aqparattyq qaýipsizdik sharalaryn jetildirýge serpin beredi. Bıyl Astanada Alem. ai. halyqaralyq jasandy ıntellekt ortalyǵynyń ashylýymen IT-mamandarǵa jańa múmkindikter paıda bolady.
Jumys sapary aıasynda Dmıtrıı Grıgorenko Qazaqstannyń jetekshi IT-alańdarynyń, sonyń ishinde Astana Hub tehnoparki jáne NU tehnoparkiniń qyzmetimen tanysady, onda búginde 1600-den astam IT-kompanııalar tirkelgen, olardyń 425-ine sheteldikter qatysyp jatyr.
Osyǵan deıin habarlanǵandaı, Bektenov halyqaralyq uıymdar basshylyǵymen sportty damytý máselelerin talqylady.