Qazaqstan Reseı SІM-ine Máskeýde qazaqstandyqtyń óltirilýine qatysty resmı nota joldady
ASTANA. 29 qarasha. QazAqparat - Qazaqstan Reseı Syrtqy ister mınıstrligine Máskeýde qazaqstandyqtyń óltirilýine qatysty resmı nota joldady. Bul týraly búgin QR Syrtqy ister mınıstrliginiń resmı ókili Janbolat Úsenov málim etti.
2013 jylǵy 23 qarasha kúni Máskeý qalasynyń «Kotlovka» ózeniniń jaǵasynda1981 jyly dúnıege kelgen QR azamatshasy Najapova Bırjahanýmnyń máıiti tabylǵandyǵyn eske salǵan ol: «Qazirgi tańda Máskeý boıynsha Tergeý komıteti Bas tergeý basqarmasynyń Zıýzınsk aýdanaralyq tergeý bólimshesi qylmystyq is qozǵady. Qazaqstannyń Reseı Federatsııasyndaǵy Elshiligi RF Syrtqy ister mınıstrligine resmı nota joldap, onda Qazaqstan tarapynyń atalǵan máselege qatysty alańdaýshylyǵyn jetkizgen jáne osy is boıynsha jedel ári jan-jaqty tergeý amaldaryn júzege asyrýdy suraǵan»,- dedi.
Resmı ókildiń aıtýynsha, atalǵan azamatshanyń týystarymen QR Syrtqy ister mınıstrligi habarlasqan ári vedomstvo tarapynan máıitti Qazaqstanǵa tasymaldaýǵa qatysty tolyq kómek kórsetiletin bolady.
