Qazaqstan-Reseı shekarasynda taýarlar kontrabandasy anyqtaldy
2021 jylǵy 11 maýsymda Qazaqstan-Reseı shekarasyndaǵy «Syrym» ótkizý pýnktinde BQO boıynsha MKD eksporttyq baqylaý qyzmetkerleri 1189 313 rýbl nemese 6 957 481 teńge somasyna halyq tutynatyn taýarlary tıelgen qazaqstandyq fırmasynyń atyna tıesili Reseı Federatsııasynan kele jatqan avtokólik quraly toqtatylyp, ustaldy.
Derekterdi taldaý nátıjesinde qazaqstandyq fırmanyń taýar ımportyna qatysy joq ekendigi anyqtaldy. Al jalǵyz quryltaıshy men basshy bolyp tabylgan tulǵa uıymnyń qarjy-sharýashylyq qyzmetine eshbir qatysy joq jáne spırttik ishimdik ishkeni úshin birneshe ret ákimshilik jaýapkershilikke tartylǵan, turǵylyqty jeri joq adam bolyp shyqty.
«Qazirgi ýaqytta is boıynsha barlyq mán-jaılar anyqtalýda jáne QQS tólemeý túrindegi bıýdjet shyǵyndarynyń somasy anyqtalýda. Barlyq qatysy bar tulǵalar qoldanystaǵy zańnamaǵa sáıkes jaýapkershilikke tartylatyn bolady», - dedi komıtetten.
