Qazaqstan-Reseı shekarasynan ótý jeńildetiledi - Parlament
ASTANA. 20 maýsym. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy Qazaqstan-Reseı memlekettik shekarasynda birlesken baqylaýdy júzege asyrý salasyndaǵy yntymaqtastyq týraly kelisimdi ratıfıkatsııalaý týraly» QR Zańyn qabyldady.
Eki memleket arasyndaǵy yntymaqtastyq týraly osy kelisimge 2009 jyldyń qyrkúıeginde Orynbor qalasynda qol qoıylǵan. Atalǵan qujatta bıýrokratııalyq formaldylyqtar men baqylaý uzaqtyǵyn qysqartý, sondaı-aq onyń tıimdiligin jeke tulǵalar men kólik quraldarynyń Qazaqstan-Reseı shekarasyn kesip ótýi kezinde birlesken baqylaýdy júrgizý jolymen arttyrý kózdeledi.
Bul rette eki taraptyń baqylaý organdary zańnamalyq buzýlar nemese buzýǵa árekettenýler faktisin rastaý úshin dáleldemeler jınaýdy qamtamasyz etý maqsatynda bir-birine qajetti kómek kórsetedi.
Jalpy, kelisimdi ratıfıkatsııalaý shekaradaǵy baqylaýdy jeńildetýge jáne jedeldetýge múmkindik beredi. Syrtqy ekonomıkalyq qyzmettiń qatysýshylaryna qolaıly jaǵdaı týǵyzady. Sonymen birge, eki memleket arasyndaǵy taýar aınalymyn arttyrady.
Parlament qabyldaǵan zań Memleket basshysynyń qol qoıýyna joldanady.
