Qazaqstan-Reseı shekarasynyń Aqtóbe oblysy aýmaǵynda júk kóligi kóbeıdi
AQTÓBE. KAZINFORM – Reseıdiń Mashtakova, Ozınkı shekara beketinde jóndeý jumystary júrgizilip jatyr. Saldarynan Tasqala men Syrym beketinen ótýi tıis júk kólikteri Aqtóbeniń Jaısań beketine aýysyp, munda keptelis túzeldi. Qazir shekaradaǵy ótkizý jolaǵynyń tártibi ózgerdi.
Jaısań shekara beketinde júk kólikteri kóbeıdi. RF Saratov oblysy aýmaǵyndaǵy Mashtakova, Ozınkı shekara ótkizý beketindegi jol-tekserý keshenderine tehnıkalyq tekserý júrgizilip jatyr. Sonymen birge júk kólikterine arnalǵan jol da kúrdeli jóndeýden ótpek. Saldarynan tranzıttik jáne reseılik júk kólikteri Jaısań shekara beketine qaraı aǵylyp jatyr.
- Eksport baǵytynda, ıaǵnı, Qazaqstannan Reseıge ótý kezinde keptelis boldy. Sebebi shyǵýǵa arnalǵan beıtarap jolaq bos bolmaı qaldy. Reseı tarapy úlgermeı, kólikti baıaý ótkizdi. Negizi Jaısań avtoótkizý beketinde 8 jolaq bar. Tórteýi shyǵý, tórteýi kirý jolaǵy. Al Reseı tarapynda eki jolaq qarastyrylǵan. Avtokólikterdiń qozǵalysyn rettep, ony kirgizip-shyǵarý, jeke tulǵalardy tekserý shekara qyzmetiniń quzyryna kiredi. Eksporttyq baqylaý bólimi qyzmetkerleriniń mindeti - qujatty júıege engizý, monıtorıng júrgizý, tirkeý. Bir júk kóligin tirkeý úshin 5-7 mınýt qajet. Reseıden júk kóligi kóp kelip jatqan soń tórt jolaqtyń úsheýin júk kólikterine arnap qoıdyq. Qalǵany avtobýstar men jeńil kólikke arnaldy. Buǵan deıin ekeýi júk kóligine, qalǵan ekeýi jeńil kólik pen avtobýstarǵa arnalǵan edi,- dedi Aqtóbe oblystyq memlekettik kirister departamenti basqarmasynyń basshysy Baqytjan Mahanov.
Onyń aıtýynsha, bul ýaqytsha qıyndyq. Ol júk tasymaldaýshylar men salyq tóleýshilerden túsinistikpen qaraýdy surady.
- Qazir tórt tereze jumys istep tur. Ekeýi eksport, ekeýi ımport. Buǵan deıin 900-ge jýyq avtokólik kirip-shyqsa, keshe 1100-den asyp ketti,- dedi Baqytjan Mahanov.
Aıta keteıik, Reseıdiń eki shekara beketinde jóndeý jumystary 31 qazanǵa deıin aıaqtalýy tıis. Buǵan deıin Qazaqstan men Reseı arasyndaǵy shekara beketinde kólik qozǵalysy ýaqytsha shektelýi múmkin ekeni aıtyldy.
