Qazaqstan-Reseı shekarasynda júzdegen eliktiń qyrylǵany týraly aqparat tarady

PAVLODAR. KAZINFORM — Reseı BAQ-tarynda Novosibir oblysynyń Qazaqstanmen shektesetin jerinde júzdegen eliktiń qyrylyp jatqany týraly aqparat tarady. 

Aqparatta jabaıy janýarlar Qarasýyq aýdanyndaǵy kólde qatqan muzdan óte almaı, top-tobymen qyrylyp qalǵany aıtylady. Jergilikti tabıǵat qorǵaý vedomstvosy muzdy kólderdiń birinde janýarlardy qutqarý boıynsha «kúrdeli jáne aýqymdy operatsııany» ınspektorlar ańshylarmen birlesip júrgizdi dep málimdegen. Áıtse de olar júzdegen janýar qyrylyp qaldy degen aqparat durys emes dep otyr.

Al jergilikti turǵyndar ınspektorlar elikterdi qutqarǵanymen jaǵaǵa laqtyryp tastap jatqandaryna qynjylys tanytqan. Shyn máninde janýarlardyń boıyn jylytyp, sosyn bosatý kerek ekenin alǵa tartady.

Novosibir oblysynyń Qarasýyq aýdany Pavlodar oblysynyń Tereńkól jáne Ýspen aýdandarymen shekaralas. Qos memlekettiń bul aýmaqtaǵy shekarasynda Qarasýyq jáne Shaǵan kólderi ornalasqan. Reseıdiń ishki jaǵynan aýa bastaǵan túz taǵylary atalǵan sý aıdyndaryn basyp ótýi yqtımal.

Pavlodar oblystyq orman sharýashylyǵy jáne janýarlar dúnıesi aýmaqtyq ınspektsııasynyń ókilderi shekaralyq aımaqtarda elikterdiń qyrylýy týraly aqparat túspegenin habarlady.

— Qazirgi ýaqytta sibir elikterinde kúıekke túsý mezgili bastaldy. Jabaıy janýarlar shaǵylysý úshin ózderine qolaıly jer izdep, mıgratsııa jasaıdy. Elikterdiń shoǵyrlanyp, top-tobymen kóship-qonýy týraly málimetter bar. Tek Pavlodar oblysynda ǵana emes, Qaraǵandy óńirinde elikterdiń shoǵyrlanýy tirkelgenin áriptesterimiz aıtyp jatyr. Bul ýaqytsha qubylys. Biraq janýarlardyń ólýi týraly aqparat joq. Qazir biz jergilikti orman sharýashylyqtarynan elikterdiń qozǵalysy týraly málimetter jınap jatyrmyz. Onyń nátıjesi eki-úsh kúnde belgili bolady, — deıdi oblystyq orman sharýashylyǵy jáne janýarlar dúnıesi aýmaqtyq ınspektsııasynyń basshysy Isataı Abdrazahov.

Resmı málimetterge súıensek, búginde Pavlodar oblysynyń aýmaǵynda shamamen 4800-deı elik bar.

Inspektsııadan habarlaǵandaı, qazirgi ýaqytta Jelezın aýdany aýmaǵynda Reseı Federatsııasynyń Novosibir oblysy tarapynan elikterdiń jappaı kóshi-qony baıqalyp otyr. Elikter Jelezın aýdanynyń aýmaǵynda astyq jáne kúnbaǵys alqaptarynda kidirip qalyp jatyr. Jınalmaı qalǵan kúnbaǵys alqaptary -olar úshin aıtarlyqtaı azyq kózi.

Elikterdiń kóshi-qony sondaı-aq Ýspen jáne Tereńkól aýdandary baǵytynda da baıqalady, munda olar úshin jetkilikti jem-shóp qory (egin alqaptary) bar.

Buǵan deıin elikterdiń jappaı kóshi-qony tirkelmegen. Ádette maýsymdyq kezeńde jeke dara nemese shaǵyn toptar túrindegi kóshi-qon ǵana bolyp turatyn. Tuıaqty janýarlardyń mundaı qozǵalysyna ártúrli sebepter yqpal etýi múmkin — tirshilik ortasynyń buzylýy, qolaısyz aýa raıy nemese tabıǵı azyqtyń qoljetimsizdigi.

— Ańshylyq sharýashylyǵy sýbektilerine elikterdiń qyrylý faktilerin, sondaı-aq sý aıdyndarynda jabaıy tuıaqty janýarlardyń qıyn jaǵdaıda qalýy nemese turyp qalýy múmkin jaǵdaılaryn anyqtaý maqsatynda aýmaqtarda monıtorıng júrgizý jóninde hattar joldanǵan, — dep qosty ınspektsııadan.

Qazirgi ýaqytta orman kúzeti tarapynan qorǵaý sharalary men janýarlar boıynsha monıtorıng kúsheıtildi. Sonymen qatar qalyptasqan jaǵdaıǵa baılanysty sibir eliginiń qosymsha esebi júrgiziletin bolady.

Eske sala keteıik, Pavlodarda elikterdi zańsyz atqan aýyl turǵyny ustaldy.