Qazaqstan-Reseı shekarasynda júk kólikteri kóbeıdi: júrgizýshilerge balamaly baǵyttar usynyldy
ASTANA. KAZINFORM – Qazirgi ýaqytta Qazaqstan-Reseı shekarasyndaǵy «Qosaq» (Pavlodar oblysy) ótkizý pýnktinde júk kólikteriniń keptelesi baıqalady.
UQK málimetinshe jaǵdaı jemis-jıdek pen kókónis ónimderin tasymaldaýdyń maýsymdyq artýyna baılanysty.
— Kútý ýaqytyn barynsha azaıtý úshin ótkizý pýnkti kúsheıtilgen rejımde jumys istep tur, qajetti sharalar qabyldanýda, sondaı-aq jergilikti atqarýshy organdarmen tyǵyz is-qımyl uıymdastyryldy.
Pavlodar oblysynda «Sharbaqty» jáne «Úrlitóbe» halyqaralyq ótkizý pýnktteri de jumys isteıtinin eske salamyz. Soltústik Qazaqstan oblysynda «Jańa Jol», «Qaraqoǵa» jáne «Qyzyl Jar» ótkizý pýnktteri jumys isteıdi.
Budan bólek, belgili bir kúnge bos oryndardyń bar-joǵyn naqtylaýǵa jáne shekaradan ótý ýaqyty men ornyn aldyn ala josparlaýǵa múmkindik beretin elektrondyq kezek júıesi jumys isteıdi. Bul ótkizý pýnktine túsetin júktemeni azaıtýǵa septigin tıgizedi jáne tasymaldaýshylar úshin protsestiń aldyn ala boljamdy bolýyn qamtamasyz etedi, — delingen habarlamada.
Mysaly, «Qosaq» ótkizý pýnktiniń shyǵý baǵytyndaǵy ortasha ótkizý qabileti táýligine shamamen 200-220 júk kóligin quraıdy.
— Bolǵan jaǵdaıdy eskere otyryp, qozǵalysty balamaly baǵyttar arqyly aldyn ala josparlaýdy suraımyz, — delingen habarlamada.
Aıta ketelik otandyq júk tasymaldaýshylar úsh elge ruqsatty onlaın rásimdeı alady.
