Qazaqstan-Reseı shekarasynda 270 kólik kepteliste tur
ASTANA. KAZINFORM – Qostanaı oblysyndaǵy «Qaıraq» halyqaralyq avtomobıl ótkizý beketinde kólik aǵynynyń artýyna baılanysty kezek paıda boldy. Qazirgi ýaqytta memlekettik shekaradan ótý úshin shamamen 270 júk jáne jeńil kólik kútip tur.
Bul týraly Qostanaı oblysy boıynsha UQK Shekara qyzmeti departamentiniń baspasóz qyzmeti habarlady.
Vedomstvonyń málimetinshe, kólik aǵynynyń kóbeıýi maýsymdyq faktorlarǵa baılanysty. Atap aıtqanda, aýyl sharýashylyǵy ónimderin tasymaldaý kólemi artqan. Sonymen qatar jazǵy demalys pen mektep kanıkýly kezeńinde jolaýshylar sany da kóbeıgen.
«Ótkizý beketine qosymsha júkteme basqa baǵyttardan kólik aǵyndarynyń qaıta bólinýine baılanysty týyndap otyr. Qazirgi ýaqytta memlekettik shekaradan ótý úshin shamamen 270 júk jáne jeńil avtokólik kezekte tur. Shekara qyzmetiniń bólimsheleri shtattyq rejımde jumys istep jatyr», – dep habarlady vedomstvo.
Shekara qyzmetiniń málimetinshe, júk kólikteriniń ýaqytsha jınalýy Batys Qazaqstan oblysyndaǵy «Syrym», Aqtóbe oblysyndaǵy «Jaısan» jáne Pavlodar oblysyndaǵy «Qosaq» ótkizý beketterinde de baıqalady.
Osyǵan baılanysty birqatar tasymaldaýshylar baǵyttaryn ózgertip, balama joldardy, sonyń ishinde «Qaıraq» ótkizý beketin paıdalanýǵa kóshken.
Vedomstvo ókilderi azamattar men kólik quraldaryn ótkizý belgilengen tártippen júrgizilip jatqanyn jáne ótkizý beketiniń úzdiksiz jumysyn qamtamasyz etý úshin qajetti sharalar qabyldanyp jatqanyn atap ótti.
Qostanaı oblysynda «Qaıraq» halyqaralyq ótkizý beketinen bólek «Aqbalshyq», «Ýbaǵan», «Aıat», «Jelqýar» jáne «Qońdybaı» ekijaqty avtomobıl ótkizý beketteri jumys isteıdi.
Aıta keteıik, buǵan deıin Pavlodar oblysynda jemis-kókónis ónimderin tasymaldaý kóleminiń maýsymdyq ósýine baılanysty júk kólikteriniń kezegi paıda bolǵany habarlanǵan.
