Qazaqstan-Reseı óńiraralyq yntymaqtastyq forýmy qashan ótedi
ASTANA. KAZINFORM — Qazaqstan prezıdenti Qasym-Jomart Toqaev 20 tamyzda Ombyda ótetin Qazaqstan-Reseı óńiraralyq yntymaqtastyq forýmyna qatysty pikir aıtty.
- Álemdegi jaǵdaıǵa qaramastan, yntymaqtastyǵymyz, ásirese, ekonomıka salasyndaǵy baılanystar tabysty damyp kele jatqanyn jáne saýda kólemi artyp kele jatqanyn atap ótkim keledi. Bul jaıynda shaǵyn quramdaǵy kezdesý barysynda sóz qozǵaǵan edik, - dedi Qasym-Jomart Toqaev elimizge memlekettik saparmen kelgen Reseı Prezıdenti Vladımır Pýtınmen keńeıtilgen quramdaǵy kelissózder barysynda.
Sonymen qatar Memleket basshysy Qazaqstan men Reseı óńirleri arasyndaǵy baılanystardy jandandyrýdyń mańyzdylyǵyna toqtaldy.
- Elderimizdiń óńirleri arasyndaǵy ózara saparlardyń jıilep, óńiraralyq yntymaqtastyq forýmyn ótkizý ıgi dástúrge aınalǵany óte mańyzdy. Kelesi forým Ombyda ótetini málim boldy. Ony ótkizýdiń aldyn ala datasy retinde 20 tamyz belgilengeni maǵan habarlandy. Bul merzim men úshin jáne áriptesterimniń josparyna saı keledi. Sondyqtan dál osy kúni óńiraralyq yntymaqtastyq forýmyn ótkizýge bolady dep oılaımyn, - dedi Memleket basshysy.
Buǵan deıin habarlanǵandaı, Memleket basshysy Qasym-Jomart Toqaevtyń elimizge memlekettik saparmen kelgen Reseı Prezıdenti Vladımır Pýtındi Táýelsizdik saraıynda resmı qarsy alý rásimi ótti.
