Qazaqstan Reseı munaıyn Qytaıǵa tasymaldaýda mańyzdy ról atqarady
ASTANA. KAZINFORM – Memleket basshysy ekinshi «Ortalyq Azııa – Reseı» sammıtinde energetıka salasyndaǵy yqpaldastyqtyń áleýetine joǵary baǵa berdi. Bul týraly Aqordanyń baspasóz qyzmeti habarlady.
– Reseı, Qazaqstan jáne Ózbekstannyń úshjaqty gaz odaǵynyń arqasynda óńirde jańa energetıkalyq júıe qalyptasyp keledi. Bul halyq pen ónerkásipti kógildir otynmen senimdi túrde qamtamasyz etedi. Kaspıı qubyry konsortsıýmynyń mańyzyna arnaıy toqtalsam deımin. Byltyr osy jeli arqyly shamamen 63 mıllıon tonnaǵa jýyq otandyq munaı tasymaldandy. Atalǵan problemany tereń túsinip, naqty sharalar qabyldaǵan qurmetti Vladımır Vladımırovıch, Sizge alǵys aıtamyn. Sonymen qatar shyǵys tarmaǵynyń da ózektiligi artyp kele jatqanyn baıqaımyz. Qazaqstan Reseı munaıyn Qytaıǵa tasymaldaýda mańyzdy ról atqarady. Biz arqyly jylyna 10 mıllıon tonnaǵa deıin munaı jetkiziledi. Degenmen ótken jyly tasymaldanǵan munaı kólemi bul kórsetkishten asyp tústi. Tranzıt qarqynynyń ósýine qarasaq, onyń kólemin arttyrýǵa múmkindik bar. Birneshe kún buryn Sankt-Peterbor qalasynda Qazaqstan men Reseı arasynda gaz salasyndaǵy yntymaqtastyq jóninde mańyzdy qujatqa qol qoıyldy, – dedi Qasym-Jomart Toqaev.
Prezıdent sońǵy jyldary Reseımen atom energetıkasy salasyndaǵy yntymaqtastyq serpin alǵanyn aıtty. Osy oraıda «Rosatom» kompanııasynyń qatysýymen Qazaqstanda alǵashqy atom elektr stantsııasyn salý strategııalyq seriktestikti jańa deńgeıge kóteredi.
– Atom ónerkásibindegi yqpaldastyq birqatar janama salanyń damýyna berik negiz bola alady. Munyń biz úshin mańyzy zor. Qazaqstanda ıAdrolyq otyn tsıkli jáne radıoaktıvti qaldyqtarmen jumys isteý salasyndaǵy óńirlik quzyretti keńes qurýdy usynamyz. Zamanaýı ǵylymı-zertteý bazasy men bilikti kadr daıarlaý júıesin nyǵaıtý – ózekti másele. Bul baǵytta alǵashqy mańyzdy qadam jasaldy. Almatyda MIFI Ulttyq zertteý ıadrolyq ýnıversıtetiniń fılıaly ashyldy. Atalǵan jumysqa eki eldiń ǵylymı-zertteý ınstıtýttaryn tartyp, ony odan ári jalǵastyrýdy josparlap otyrmyz. Jaqynda Ǵylym jónindegi keńestiń otyrysyn ótkizdim. Yqpaldastyq ornatý úshin áleýettiń bar ekeni anyqtaldy ári ony paıdalanýǵa bolady, – dedi Memleket basshysy.
Qasym-Jomart Toqaev ekinshi «Ortalyq Azııa – Reseı» sammıtinde «Soltústik – Ońtústik» dáliziniń shyǵys tarmaǵyn ınvestıtsııamen jáne ınfraqurylymmen qamtamasyz etý boıynsha birlesken baǵdarlamany iske qosýdyń mańyzyn atap ótti.