Qazaqstan Reseı men Belarýs júk tasymaldaýshylarynyń qyzmetine shekteý qoımaıdy –mınıstrlik

NUR-SULTAN. QazAqparat - QR Indýstrııa jáne ınfraqurylymdyq damý mınıstrligi Reseı jáne Belarýs júk tasymaldaýshylaryna qatysty qabyldanǵan sheshim týraly málim etti, dep habarlaıdy QazAqparat.

Mınıstrlik aqparatyna sáıkes, halyqaralyq avtomobıl tasymaly salasyndaǵy álemdik tájirıbege sáıkes, ulttyq avtomobıl tasymaldaýshylardyń múddelerin qorǵaý maqsatynda ishki zańnamada úshinshi elderge/elderden júk tasymalyna shekteýler engiziledi, onyń ishinde «qaıta tıeý» boıynsha.

Qazaqstanda atalǵan talaptar 2017 jyly Investıtsııalar jáne damý mınıstrliginiń «Qazaqstan Respýblıkasynda halyqaralyq qatynasta avtomobıl tasymaldarynyń ruqsat berý júıesin qoldaný qaǵıdalaryn bekitý týraly» buıryǵymen engizilgen.

Osy talaptardy buzǵany úshin Qazaqstan Respýblıkasynda 200 AEK (avtokólik quraldarynyń júrgizýshilerine) jáne 500 AEK (zańdy tulǵalarǵa) mólsherinde ákimshilik aıyppul qarastyrylǵan. Bul rette, «qaıta tıeýge» tyıym salatyn talaptar sheteldik tasymaldaýshylarmen qatar qazaqstandyq tasymaldaýshylarǵa da birdeı dárejede qoldanylady.

Osyǵan uqsas talaptar Reseı Federatsııasynda RF Kólik mınıstriniń 2015 jylǵy 14 qazandaǵy № 301 buıryǵymen jáne «Úshinshi memleketterdiń júkterin halyqaralyq avtomobıl tasymaldaryn oryndaý erekshelikterin bekitý týraly» RF Kólik mınıstrliginiń 2020 jylǵy 28 shildedegi № 259 jańa buıryǵynda belgilengen bolatyn. Reseı Federatsııasynda osy normany buzǵany úshin 150 000 rýbl kóleminde aıyppul qarastyrylǵan.

«Aıta keterligi, qazirgi tańda oryn alǵan geosaıası jaǵdaıǵa baılanysty ótken jaqyn kúnderi reseı jáne belarýs ýákiletti organdary qazaqstandyq tarapty habardar etpesten, 2023 jyldyń 1 qańtaryna deıin «qaıta tıeýge» tyıym salý týraly talaptyń kúshin toqtatty.

Osyǵan baılanysty Qazaqstanda «qaıta tıeýge» tyıym salý týraly talap qoldanysta ekenin aıta ketken jón.

2022 jylǵy 30 mamyrda Qazaqstan men RF Úkimet basshylarynyń kezdesýi barysynda «qaıta tıeýge» tyıym salý talaptarynyń áreket etýin toqtata turý týraly habarlamany talqylaǵannan keıin, Qazaqstan tarapy túsinistik tanytyp, oryn alǵan jaǵdaıdy tıimdi sheshýdi usyndy. «Qaıta tıeýge» tyıym salý týraly talap kelesi jyldyń basyna deıin belarýstik jáne reseılik tasymaldaýshylarǵa da qatysty qoldanylmaıdy», - delingen QR IIDM málimdemesinde.

Qazirgi tańda Qazaqstan men Reseı Federatsııasynyń quzyretti memlekettik organdary men uıymdary tıisti konsýltatsııalar júrgizip jatyr. Olardyń nátıjeleri boıynsha ózara qolaıly sheshimder qabyldanatyn bolady.

«Osy rette Qazaqstan Respýblıkasynyń zańnamasynda úshinshi elderge/elderden halyqaralyq avtomobıl tasymaldary kezinde qaıta tıeýdi júzege asyrý múmkindigine shekteý qoıylmaıdy. Atalǵan maqsattarda ruqsat beretin arnaıy qujat alý qajet.

Búginde Qazaqstan Respýblıkasynda Qazaqstannan Eýropa elderine júk tasymaldaýdy qamtamasyz etetin 40-qa jýyq kompanııa tirkelgen. Onda kólik quraldarynyń jalpy parki 3 myń birlikti quraıdy», - dedi mınıstrlikten.