Qazaqstan-Reseı ındýstrııaldy-ınnovatsııalyq yntymaqtastyq baǵdarlamasy iske asyrylady
AQTÓBE. QazAqparat - Qazaqstan-Reseı elderiniń ındýstrııaldy-ınnovatsııalyq yntymaqtastyq baǵdarlamasy aıasynda 41 joba iske asyrylady, dep habarlaıdy QazAqparat tilshisi.
Aqtóbede Qazaqstan-Reseı arasyndaǵy úkimetaralyq komıssııa otyrysy ótti. Buǵan deıin habarlaǵanymyzdaı, QR Premer-Mınıstriniń birinshi orynbasary Asqar Mamın men Reseı Federatsııasy Úkimet tóraǵasynyń birinshi orynbasary Igor Shývalov rels-arqalyq zaýytyn aralaǵan bolatyn.
Keıin eki eldiń kásipkerleriniń qatysýymen HІH úkimetaralyq komıssııa otyrysynda birlesken kásiporyndardy ashý, ekonomıkalyq yntymaqtastyqty nyǵaıtý týraly jıyn ótti. QR Premer-Mınıstriniń birinshi orynbasary Asqar Mamınniń aıtýynsha, 2017-2020 jyldarǵa arnalǵan Qazaqstan-Reseı arasyndaǵy ındýstrııaldyq-ınnovatsııalyq yntymaqtastyq baǵdarlamasy aıasynda quny 4,5 mıllıard dollar bolatyn 41 joba iske asyrylady. Qazirgi kúni Qazaqstanda Reseı ınvestorlarynyń qatysýymen 7 myńnan astam kompanııa jumys istep tur. Al 2005-2017 jyldar aralyǵynda Qazaqstan ekonomıkasyna Reseıden 11 mıllıard dollarǵa jýyq ınvestıtsııa tartyldy.
Aıta keteıik, Qazaqstan-Reseı qarym-qatynasyn damytý úshin «Batys Qytaı-Batys Eýropa» halyqaralyq dáliziniń mańyzy zor. Tek Reseı tarapy áli kúnge deıin óz terrıtorııasyndaǵy jol qurylysyn aıaqtaýǵa asyǵar emes. Al 2017 jyldyń 9 aıynda Qazaqstan-Reseı arasyndaǵy júk tasymaly temirjol salasynda 45,5 mıllıon tonnaǵa jetti. Bul ótken jyldyń sáıkes kezeńimen salystyrǵanda júk tasymalynyń 20 paıyzǵa artqanyn kórsetedi.
«Chelıabide ótken kezdesý kezinde Qazaqstanda óndirilgen taýardy Reseıge ótkizý, tranzıttik júkterdi tasymaldaýda qıyndyq bolǵany aıtyldy. Biz óz tarapymyzdan bul shekteýler men kedergilerdi tez arada joıý úshin jumys isteımiz. Jaqyn kúnderi arnaıy jumys josparyn quryp, habardar etemiz. Sonymen qatar, eki el prezıdentteriniń kezdesýi kezinde temirjol qatynasyn jandardyrý baǵytynda tapsyrma berilgen bolatyn. Bul jumys bastaldy. Ári «Batys Qytaı-Batys Eýropa» jolynyń ózimizge tıesili aýmaqty iske qosýǵa kúsh salamyz»,- dedi Reseı Federatsııasy Úkimet tóraǵasynyń birinshi orynbasary Igor Shývalov.
Aqtóbe men Reseı arasyndaǵy taýar aınalym 146 paıyzdy qurap, 828 mıllıon dollarǵa jetti. Chelıabi men Orynbor arasyndaǵy taýar aınalym úsh esege artyp otyr. Qazirgi kúni Aqtóbede reseılik kapıtaldyń qatysýymen 650 kompanııa jumys istep tur.
