Qazaqstan Reseı arqyly 400 myń tonna, Qytaı arqyly Shyǵys Azııa elderine 200 myń tonna astyq tasymaldaýdy kózdep otyr - M. Orazaev
ASTANA. Naýryzdyń 18-i. QazAqparat /Qanat Mámetqazyuly/ - Qazaqstan Reseı arqyly 400 myń tonna jáne Qytaı arqyly Shyǵys Azııa elderine 200 myń tonna astyq tasymaldaýdy kózdep otyr.
Búgin QR Parlamenti Senatynyń jalpy otyrysynda 2010 jylǵa arnalǵan naqtylanǵan bıýdjetti talqylaý barysynda Aýyl sharýashylyǵy vıtse-mınıstri Marat Orazaev osylaı málim etti, dep habarlaıdy QazAqparat.
«Búgingi kúni Qazaqstannan jalpy somasy 1 mlrd. 300 mln. teńgeni quraıtyn 400 myń tonna astyq eksporttaldy. Ótken jyldyń qarasha aıynda Úkimet qaýlysy arqyly astyq naryǵyn jandandyrý maqsatyna 5 mlrd. teńge bólgen bolatyn. Sonymen birge, qazirgi kezde eksportty damytýǵa kedergi bolyp otyrǵan jaǵdaılar týyndaǵan. Sondyqtan da, biz tıisti memlekettik organdarmen birlesip ótken jyly bólingen 5 mlrd. teńgeni eki baǵytta paıdalaný týraly usynystar ázirledik. ıAǵnı, bul baǵyttar boıynsha Reseı arqyly 400 myń tonna jáne Qytaı arqyly Shyǵys Azııa elderine 200 myń tonna astyq tasymaldaýǵa múmkindikter qarastyrylady», dedi M. Orazaev. Onyń aıtýynsha, buryn astyqty tasymaldaý sýbsıdııasy tonnasyna 20 dollardy qurasa, qazir onyń qunyn 40 dollarǵa deıin kóterý qarastyrylýda.
«Sonymen birge, soltústik oblystardaǵy astyqty batys oblystarǵa tasyp, kóshirý máselesi de ózekti. Ótken jyldyń sońyna taman «Azyq-túlik korporatsııasy» óziniń únemdelgen bıýdjet qarajatyna 100 myń tonna astyqty batys oblystarǵa qaraı tasyǵan bolatyn. Qazirgi kúni qalǵan 400 myń tonna astyqty osyndaı maqsatta tasymaldaý úshin usynystardy ázirleýdemiz», dedi vıtse-mınıstr.
