16:57, 24 Qańtar 2024 | GMT +6
Qazaqstan-Reseı arasyndaǵy taýar aınalymy $350 mln-nan asty - Álıhan Smaıylov
ASTANA. KAZINFORM – Qazaqstan Premer-Mınıstri Álıhan Smaıylov Astanaǵa delegatsııamen kelgen Reseı Federatsııasy Bashqurtstan Respýblıkasynyń basshysy Radıı Habırovpen kezdesti - dep jazady QR Premer-Mınıstriniń resmı aqparattyq resýrsy.
Reseı Qazaqstannyń negizgi saýda-ekonomıkalyq áriptesteriniń biri.
Buǵan 2022 jyly taýar aınalymy kóleminiń 10%-ǵa ósip, $27 mlrd-qa jetkeni dálel.
Ótken jyldyń 11 aıynda da aradaǵy saýda-sattyq jaqsy nátıje kórsetip, shamamen $24 mlrd-ty qurady.
«Qazaqstan-Reseı saýda qatynastarynyń damýyna Bashqurtstan Respýblıkasy eleýli úles qosýda. Atalǵan kezeńde óńirler arasyndaǵy taýar aınalymy $350 mln-nan asty. Osy rette aradaǵy saýda-ekonomıkalyq baılanystardy odan ári keńeıtý úshin zor áleýet bar», — dedi Álıhan Smaıylov.
Óz tarapynan Bashqurtstan basshysy ónerkásip kooperatsııasyn odan ári tereńdetýge jáne saýda qatynastaryn damytýǵa qyzyǵýshylyq tanytty.
«Bizdiń kásiporyndarymyzdyń ekonomıkalyq yntymaqtastyǵy artyp keledi. Múmkindikter endi ǵana iske asyryla bastalǵanyn kórip otyrmyz. Taýar aınalymyn odan ári ulǵaıtý aldaǵy jyldardaǵy ortaq mindetimiz dep sanaımyn. Bul úshin tıisti alǵysharttardyń barlyǵy bar», — dedi Radıı Habırov.
