Qazaqstan-Reseı arasyndaǵy saýda qatynasy tsıfrlyq formatqa aýysady
ASTANA. KAZINFORM – Saýda aınalymynda qaǵaz qujattar azaıtylady jáne kedergi bolatyn tekseris sharalary alynyp tastalady. Bul jóninde QR Qarjy vıtse-mınıstri Erjan Birjanov málimdedi.
– Qazir birneshe pılottyq joba iske asyp jatyr. Solardyń biri retinde 11 aqpannan bastap navıgatsııalyq plomba engizildi. Elder arasyndaǵy tranzıttik kólikterge navıgatsııalyq plomba ornatylyp, olar onlaın baqylanyp otyr. Sonyń arqasynda fızıkalyq tekserýler alynyp tastaldy. Bul joba oń nátıje kórsetip jatyr. Ony ary qaraı da damyta beremiz, – dedi ol.
Ekinshi joba temirjoldaǵy qozǵalysty qaǵaz qujattardan aryltyp, elektrondyq formatqa kóshirýge arnalady.
– Bul joba da júzege asyrylyp jatyr. Sonyń arqasynda rásimdeý úderisi 30 mınýttan 10 mınýtqa qysqartyldy. Sondaı-aq Eýropa baǵytyndaǵy tranzıt ulǵaıyp jatyr. Bul maqsattaǵy jumystar áli de jalǵasady. Aldaǵy ýaqytta eki el arasyndaǵy saýda aınalymy, taýar tasymaly tolyqtaı elektrondy formatqa aýystyrylady, – dedi E.Birjanov.
Onyń sózinshe, ınfraqurylymdy damytý da nazardan tys qalmaıdy.
– Taǵy bir baǵyt – ınfraqurylym. Eki el arasyndaǵy beketterde jańǵyrtý jumystary júrgizilip jatyr. 30 beket zamanaýı talaptarǵa saı bolady. Osy jobanyń arqasynda beketterdegi joldar keńeıtiledi jáne jańa tehnıkalyq quraldar tekserý úderisterin jeńildetedi. Munyń bári taýar aınalymyn kedergilerden aryltady, – dedi Qarjy vıtse-mınıstri.
Aıta keteıik buǵan deıin Qazaqstan-Reseı arasyndaǵy saýda aınalymy 30 mıllıard dollarǵa jýyqtaǵanyn jazǵanbyz.
