Qazaqstan-Reseı arasyndaǵy saýda aınalymy 30 mıllıard dollarǵa jýyqtady
ASTANA. KAZINFORM – Eki el arasyndaǵy seriktestik qarym-qatynastar keńeıip keledi. Bul jóninde QR Premer-mınıstri Oljas Bektenov elimizge resmı saparmen kelgen RF Úkimetiniń tóraǵasy Mıhaıl Mıshýstınmen kezdesýde málimdedi.
Jıynda ekijaqty kelissózder júrgizildi. Saýda-ekonomıkalyq, ınvestıtsııalyq yntymaqtastyq, ónerkásip jáne energetıka, kólik salasyndaǵy jobalardy júzege asyrý, sondaı-aq ekologııa salasyndaǵy ózara is-qımyl máseleleri qaraldy.
– Memleket basshysy Qasym-Jomart Toqaev pen Vladımır Pýtınniń birlesken kúsh-jigeriniń arqasynda qazaq-reseı qatynastary ózara is-qımyldyń sapaly jańa deńgeıine kóterildi. Sońǵy jyldary ózara saýda kólemi 30 mlrd-tyq mejege edáýir jaqyndady, – dedi O.Bektenov.
Sonymen qatar ol qos memleket arasyndaǵy saýda aınalymyna toqtaldy.
– Reseı Qazaqstan ekonomıkasyna salynǵan ınvestıtsııalar kólemi boıynsha kóshbasshy elder qatarynda. Máselen, ótken jyldyń 9 aıynda kórshimizden $2,1 mlrd ınvestıtsııa tartyldy. Al 20 jyl ishinde reseılik tikeleı ınvestıtsııalar kólemi $28,5 mlrd-qa jetti. Qazaqstan RF ekonomıkasyna $9 mlrd ınvestıtsııa saldy, – dedi QR Premer-mınıstri.
Sondaı-aq ol elimizdiń seriktestikti jańa baǵyttarda órkendetýge daıyn ekenin atap ótti.
Al Reseı Úkimetiniń tóraǵasy jańa Konstıtýtsııa qabyldaǵan Qazaq elin quttyqtady.
– Sizdi jáne qazaqstandyqtardy tarıhı oqıǵamen, jańa Konstıtýtsııalaryńyzdyń qabyldanýymen shyn júrekten quttyqtaımyn. Referendým nátıjesi Qazaqstan halqynyń el Prezıdenti, Qasym-Jomart Kemeluly Toqaevtyń zamanaýı ári órkendegen memleket qurý, respýblıka azamattarynyń ál-aýqatyn arttyrý baǵytyn qoldaıtynyn naqtylaı tústi, – dedi M.Mıshýstın.
Aıta keteıik buǵan deıin Qazaqstan Reseı munaıyn Qytaıǵa tasymaldaýda mańyzdy ról atqaratynyn jazǵanbyz.
