Qazaqstan regıstrlik negizdegi halyq sanaǵyna kóshýdi talqylap jatyr
ASTANA. KAZINFORM – Astanada halyq sanaǵyn regıstrler negizinde júrgizýge daıyndyq máselelerine arnalǵan úsh kúndik ulttyq tehnıkalyq semınar bastaldy.
Іs-shara memlekettik organdardyń ókilderin, halyqaralyq uıymdardy jáne statıstıka salasyndaǵy jetekshi sarapshylardy biriktirip, ulttyq statıstıkalyq júıeni jańǵyrtýdyń kelesi qadamdaryn talqylaýǵa baǵyttalǵan.
Semınar barysynda qatysýshylar ákimshilik derekterdiń sapasy men qazirgi jaǵdaıyn saralap, halyq sanaǵy maqsatynda memlekettik aqparattyq júıelerdiń daıyndyǵyn baǵalaıdy. Sonymen qatar statıstıkalyq regıstrlerdi damytý baǵyttaryn aıqyndap, Qazaqstannyń regıstrlik halyq sanaǵyna kóshýine qatysty usynystar ázirleıdi.
Іs-shara BUU-nyń Azııa jáne Tynyq muhıty boıynsha ekonomıkalyq jáne áleýmettik komıssııasy men BUU Halyqty qonystandyrý qorynyń bastamasymen júzege asyrylyp jatqan óńirlik joba aıasynda uıymdastyryldy.
«BUU-nyń 2030 jylǵy halyq sanaǵy kezeńine daıyndyq jónindegi usynymdaryn eskere otyryp, Qazaqstan statıstıkalyq regıstrlerdi damytý jáne ákimshilik derekterdi keńinen paıdalaný baǵytynda júıeli jumys júrgizip keledi. Derekter sapasy, memlekettik aqparattyq júıelerdi damytý jáne vedomstvoaralyq ózara is-qımyl regıstrlik halyq sanaǵyna tabysty kóshý úshin sheshýshi mánge ıe. Ulttyq statıstıka bıýrosy halyqtyń statıstıkalyq regıstrin jetildirip, memlekettik organdarmen birlesip aqparattyq resýrstardyń daıyndyǵyn baǵalap jatyr. Bul semınar ulttyq statıstıkalyq júıeni odan ári jetildirýge qajetti praktıkalyq sheshimder ázirleýge múmkindik beredi dep senemiz», – dedi QR SJRA Ulttyq statıstıka bıýrosy basshysynyń orynbasary Gúlmıra Qaraýylova.
Semınar baǵdarlamasyna memlekettik organdardyń qatysýymen ótetin saraptamalyq sessııalar men praktıkalyq talqylaýlar engizilgen.
Qazaqstandaǵy BUU Halyqty qonystandyrý qorynyń ókili ári Qyrǵyzstan men Túrikmenstandaǵy eldik dırektory Chınve Ogbonna uıymnyń Qazaqstanǵa halyq sanaǵynyń jańa býynyn daıyndaý jáne zamanaýı statıstıkalyq júıeni damytý baǵytynda qoldaý kórsetýdi jalǵastyratynyn aıtty.
«Regıstrler negizindegi halyq sanaǵyna kóshý memlekettik statıstıkanyń tıimdi ári turaqty júıesin qalyptastyrý jolyndaǵy mańyzdy qadam. Bul úderistiń tabysty bolýy ákimshilik derekterdiń sapasyna, tsıfrlyq ınfraqurylymnyń damýyna jáne memlekettik organdar arasyndaǵy tyǵyz ózara is-qımylǵa baılanysty. ıÝNFPA Qazaqstannyń halyqaralyq standarttardy engizý baǵytyndaǵy umtylysyn qoldaıdy jáne barlyq kezeńde saraptamalyq kómek kórsetýge daıyn», – dedi ol.
Mamandardyń pikirinshe, regıstrlik halyq sanaǵyna kóshý statıstıkalyq derekterdiń sapasyn arttyryp, halyqqa túsetin júktemeni azaıtýǵa jáne memlekettik sheshimder qabyldaý úshin qajetti aqparatty jedel alýǵa múmkindik beredi.
Aıta keteıik, 2026 jyly álemniń 26 elinde halyq sanaǵy ótkiziledi.
