Qazaqstan referendýmǵa barynsha jaqsy daıyndalǵan – TMD baıqaýshylar mıssııasy

NUR-SULTAN. QazAqparat – Táýelsiz Memleketter Dostastyǵy baıqaýshylar mıssııasynyń basshysy Leonıd Anfımov Qazaqstandaǵy referendým boıynsha óz pikirin bildirdi, dep habarlaıdy QazAqparat tilshisi.

«Daýys berýge Qazaqstan barynsha jaqsy daıyndyqpen kelgen. TMD baıqaýshylar mıssııasy referendým ótkizýdiń tehnıkalyq jaǵyna da, qoldanystaǵy zańnamanyń buzylýy turǵysynan da eshqandaı eskertý jasamady. Barlyǵy Qazaqstan zańnamasy aıasynda, osy referendýmda daýys berý protsesiniń ashyqtyǵy men demokratııany qamtamasyz etý jónindegi halyqaralyq normalar aıasynda jasalǵan», - dedi spıker Nur-Sultanda ótken baspasóz máslıhatynda.

L. Anfımov bul mıssııanyń Qazaqstannyń ishki isterine aralaspaý, saıası beıtaraptyq jáne TMD aıasynda qabyldanǵan birqatar qujat negizinde saılaý men referendým ótkizý boıynsha QR zańnamasyna sáıkes jumys isteıtinin atap ótti.

Referendýmdaǵy baıqaýshylar arasynda TMD mıssııasy kósh bastap tur. Túrli elder men TMD uıymdary atynan 144 adam akkredıttelgen.

Olar 21 mamyrda jumysyn bastady.

Osy ýaqyt ishinde mıssııa shtaby referendýmdardy retteıtin normatıvtik-quqyqtyq bazany zerttegen, mıssııaǵa qatysýshylar úshin normatıvtik-anyqtamalyq materıaldar daıyndaǵan.

TMD baıqaýshylary referendýmdy Nur-Sultan, Almaty, Shymkent qalalarynda jáne 4 oblys ortalyqtarynda baqylaıdy.

Buǵan deıin Halyqaralyq Túrki akademııasynyń baıqaýshylary Qazaqstandaǵy referendýmdy joǵary qyzyǵýshylyqpen baqylap otyrǵanyn aıtqan edi.

Olar tańǵy 7-den beri referendým ýchaskelerin aralap júr.

Sonymen birge, Qyrǵyzstannan Qazaqstanǵa 15 halyqaralyq baıqaýshy keldi. Olar Nur-Sultan men Almaty qalalarynda, Jambyl jáne Almaty oblystarynda jumys istep jatyr.

Jalpy Ortalyq referendým komıssııasy halyqaralyq uıymdar men shet memleketterden 272 ókildi baıqaýshy retinde akkredıttegen.