Qazaqstan radıolary ásem án berýdi ǵana úırendi - sarapshy
ASTANA. QazAqparat - Qazaqstanda mýzykalyq-aqparattyq baǵyttaǵy radıolar kóp, biraq ashyq pikir almasatyn radıo joqtyń qasy.Bul pikirdi Jetinshi arnanyń kreatıvti dırektory Evgenıı Pereverzev Astanada «Radio Asia 2018» halyqaralyq konferentsııasy barysynda málimdedi, dep habarlaıdy QazAqparat tilshisi.
«Qazaqstandyq radıostantsııalardy tyńdaǵanda nemese telearnalardy qaraǵanda jańasha lepti kóre almaımyn. Tyńdarman retinde buǵan deıin bir jerden tyńdaǵandaı áserde bolamyn. Bizdiń pop-juldyzdarymyz nege álemge tanymal emes? Sebebi olar qaıtalanbaıtyn biregeı tulǵa retinde qalyptasqan joq, stılderi kóshirilgen», - dedi Evgenıı Pereverzev Astanada «Radio Asia 2018» halyqaralyq konferentsııasynda.
Onyń aıtýynsha, kommertsııalyq radıo taratý isi AQSh-ta 1930 jyldary paıda boldy, al Qazaqstanǵa - 1990-jyldary keldi jáne qazaqstandyq radıostantsııalarǵa áli de kóp eńbektený qajet.
«Qazaqstan aýmaǵynda FM formatyndaǵy stantsııalarǵa jetkilikti kóńil bólinbeıdi. Radıony ermek retinde kóredi. Bizde áńgimelesip, pikir almasatyn radıo joq, radıostantsııalardyń barlyǵy mýzykalyq-aqparattyq baǵytta. Tipti aqparattyq-mýzykalyq radıo qataryna «Qazaq radıosyn» ǵana engizýge bolady. Naryq áli qalyptaspady, radıodan únemi mýzyka oınap turady. Radıo pleerge aınalyp barady, radıonyń ózindik pikiri joq, saýatty júrgizýshiler joq, naryq óte jutań. Ashyq áńgime radıosy bolmasa, úzdik júrgizýshiler qaıdan shyǵady? Biz tek ádemi án qoıýdy ǵana úırendik», - dedi ol.
Sondaı-aq, sarapshy qazaqstandyq radıolardyń sheteldik stantsııalarmen básekege túsetinin eskertti.
«Qazirgi tyńdarmandardyń kópshiligi radıony ınternet arqyly tyńdaıdy. Onyń ústine qazaqstandyq aýdıtorııa aǵylshyn tilin meńgere bastady. Demek, bizdiń radıostantsııalar AQSh pen Aýstralııa radıolarymen básekege túsip jatyr», - dedi Evgenıı Pereverzev.
Aıta keteıik, Astanada tuńǵysh ret radıony damytý máselelerine arnalǵan «Radio Asia 2018» halyqaralyq konferentsııasy ótip jatyr. Oǵan Úndistan, Maldıv, Vetnam, Qytaı, Aýǵanstan, Túrikmenstan, Túrkııa, Indonezııa syndy Azııa elderiniń radıojýrnalısteri keldi.
