Qazaqstan radıoaktıvti qaldyqtar boıynsha óńirlik keńes qurýdy usyndy
ASTANA. KAZINFORM - 2026 jylǵy 10 maýsymda Almatyda TMD – ǵa qatysýshy memleketterdiń atom energııasyn beıbit maqsatta paıdalaný jónindegi komıssııasynyń 27-shi otyrysy ótti, dep habarlaıdy Atom energııasy jónindegi agenttiktiń baspasóz qyzmeti.
Іs-sharaǵa Dostastyq memleketteriniń memlekettik organdarynyń, ǵylymı uıymdarynyń jáne atom salasy kásiporyndarynyń ókilderi qatysty.
Otyrys sheńberinde atom energetıkasyn, ıadrolyq medıtsınany damytý, ǵylymı zertteýler, kadrlar daıarlaý, atom energııasyn paıdalaný kezinde qaýipsizdikti retteýdi jetildirý, sondaı-aq atom salasyndaǵy halyqaralyq yntymaqtastyqty keńeıtý máseleleri qaraldy.
Kún tártibindegi negizgi máselelerdiń biri Qazaqstan tarapynyń Radıoaktıvti qaldyqtarmen jumys isteý jónindegi quzyretterdiń óńirlik keńesin qurý jónindegi bastamasy boldy. Bastamany Qazaqstan Respýblıkasynyń Prezıdenti Qasym-Jomart Toqaev 2025 jylǵy 9 qazanda Dýshanbede ótken «Ortalyq Azııa – Reseı» ekinshi sammıti barysynda usyndy.
Osy másele boıynsha Qazaqstan Respýblıkasynyń Atom energııasy jónindegi agenttigi tóraǵasynyń orynbasary Ǵumar Serǵazın sóz sóıledi.
Ol keńes qurý halyqaralyq yntymaqtastyqty damytý, tájirıbe almasý jáne radıoaktıvti qaldyqtarmen jumys isteý jáne ýran murasy obektilerin ońaltý salasynda kelisilgen tásilderdi ázirleý úshin ornyqty óńirlik saraptamalyq-úılestirý platformasyn qalyptastyrýǵa baǵyttalǵanyn atap ótti.
Keńes qyzmetiniń negizgi baǵyttary radıoaktıvti qaldyqtarmen jumys isteýdiń jáne ýran murasy obektilerin ońaltýdyń kelisilgen tásilderin ázirleý, radıoaktıvti qaldyqtardy basqarýdyń ulttyq júıelerin damytýǵa járdemdesý, ǵylymı-tehnıkalyq yntymaqtastyqty damytý, tájirıbe jáne aqparat almasý, sondaı-aq mamandardy daıarlaý jáne olardyń biliktiligin arttyrý bolady.
-Almatyda otyrys ótkizý TMD memleketteriniń atom energııasyn beıbit maqsatta paıdalaný salasyndaǵy yntymaqtastyqty nyǵaıtýǵa, ǵylymı-tehnıkalyq ózara is-qımyldy damytýǵa jáne qaýipsizdikti qamtamasyz etýdiń ozyq tájirıbelerin engizýge degen umtylysyn rastaıdy,-delingen habarlamada.
Osyǵan deıin Qazaqstan atom energetıkasyn damytý úshin qandaı tehnologııa qoldanatyny týraly jazdyq.
