Qazaqstan Prezıdentiniń sózi syndarly saıası jańǵyrý ıdeıasyn qýattaıdy — ózbek sarapshysy
ASTANA. KAZINFORM — Qazaqstan Prezıdenti Qasym-Jomart Toqaevtyń Egemendik deklaratsııasynyń 35 jyldyǵyna arnalǵan saltanatty is-sharada sóılegen sózi quttyqtaý ǵana emes, qoǵamdy elde iske asyryp jatqan reformalarǵa jumyldyrý boldy. Belgili ózbek saıasattanýshysy, fılosofııa ǵylymdarynyń kandıdaty, G. V. Plehanov atyndaǵy Reseı ekonomıkalyq ýnıversıtetiniń Tashkent fılıalynyń dotsenti Ravshan Nazarov Kazinform tilshisine osyndaı paıymyn aıtty.
— Prezıdent Qasym-Jomart Toqaev Egemendik deklaratsııasy qabyldanǵan kún qazirgi táýelsiz Qazaqstannyń memlekettik qurylysyn bastap bergenin aıtty. Ol qazaq halqynda «ǵasyrlarǵa jalǵasqan memlekettilik dástúri» bolǵanyn, «ulttyq rýh» pen «tarıhı ádilet» sııaqty asqaq uǵymdar legıtımdi bılik sabaqtastyǵynyń ımıdjin nyǵaıtýǵa qyzmet etetinin atap ótti — deıdi ol.
Sarapshy Prezıdent sózindegi sot reformasynyń jetistikteri, Parlament ókiletin keńeıtý, konstıtýtsııalyq ózgerister, ákimderdi tikeleı saılaý sııaqty memlekettik qurylystyń mańyzdy aspektileri egemendiktiń arqasynda iske asyp jatqanyn aıtady.
— Bul aıtylǵannyń bári kókeıdegi nıet qana emes, naqty ózgerister men jetistikterdiń esebi deýge bolady, — deıdi saıasattanýshy.
Ravshan Nazarov Prezıdent quqyqtyq tártip, patrıotızm, yntymaqtastyq, eńbek qundylyǵy, ekologııa sııaqty mańyzdy taqyryptardy qozǵanyn aıtady. Sarapshynyń pikirinshe, «Taza Qazaqstan» sııaqty jalpyulttyq bastamalar men qozǵalystar halyqtyń úmiti men memlekettiń josparyn bir arnada toǵystyratyn mádenı-normatıvtik sheńber qurýǵa talpynystan týyndap otyr.
— Túrli salada eńbegi sińgen azamattarǵa memlekettik nagradalardyń berilýi egemendik merekesine emotsııalyq ári sımvoldyq salmaq berip, bıliktiń halyqpen baılanysyn kórsetedi, — deıdi ǵalym.
Saıasattanýshy Qasym-Jomart Toqaevtyń bul jolǵy sózi syndarly saıası jańǵyrý ıdeıasy nyǵaıyp kele jatqanyn pash etkenin aıtady.
— Prezıdent halyqtyń eńbegi men ádildik bıliktiń resýrsy bola alatynyn laıyqty azamattardy marapattaý arqyly, memlekettiń áleýmettik mindettemelerine muqııat qaraýy arqyly kórsetip otyr. «Birlik» pen «yntymaq» sımvolıkasyn áspetteý arqyly qoǵam men elıtaǵa naqty ıshara berip otyr. Reformalardyń ári qaraı sátti alǵa basýyna qoǵam birligi ǵana kepil bola alatyny shyndyq. Ol bılik tizginin ustaý saltanatty sátterde kósilip sóıleıtin sheshendikpen shektelmeıtinin, «naǵyz reformalardy qajet etetin jaýapty mıssııa ekenin taǵy bir márte isimen de, sózimen ańǵartty, — dep túıindedi Ravshan Nazarov.
Sondaı-aq, Bashqurt sarapshysy Artýr Súleımenov Prezıdent Q.Toqaev ustanǵan baǵdar Egemendik deklaratsııasyndaǵy ıdeıalardy baıandy etýge baǵyttalǵanyn aıtqan bolatyn.