Qazaqstan Prezıdentiniń sapary barlyq saladaǵy baılanysty tereńdetedi - ıtalııalyq BAQ
RIM. KAZINFORM – Qazaqstan Respýblıkasynyń Prezıdenti Qasym-Jomart Toqaevtyń Rımge sapary Qazaqstan men Italııa úshin ózara tıimdi barlyq saladaǵy baılanystardy ártaraptandyrýǵa jáne tereńdetýge degen umtylysty baıqatyp otyr. Bul jaıynda ıtalııalyq BAQ Qazaqstan Prezıdentiniń osy elge saparynyń qorytyndysy boıynsha jazyp jatyr.
Il Foglio basylymy Prezıdent Toqaevtyń Italııaǵa resmı sapary Qazaqstan men Italııa arasyndaǵy úlken yntymaqtastyqtyń belgisi sanalatyn joǵary deńgeıdegi kezdesýlerdiń tutas serııasyn qamtyp, naqty nátıjege baǵyt alyp otyrǵanyn jazady. Basylym atap ótkendeı, yntymaqtastyq túrli baǵyttar boıynsha damyp keledi, ıaǵnı saıası, ekonomıkalyq, mádenı salalar qamtylǵan. Bul týraly Italııa Prezıdenti Serdjo Mattarella «Kvırınale» saraıynda Qazaqstan Respýblıkasynyń Prezıdenti Qasym-Jomart Toqaevty qabyldaǵan kezde aıtty.
Il Tempo habarlaǵandaı, kezdesý barysynda Prezıdent Mattarella Rım men Astanany yntymaqtastyqty jandandyrýǵa shaqyrdy.
«Sizdi jáne birge kelgen delegatsııany qarsy alý men úshin úlken mártebe. Italııaǵa saparyńyz bizdiń el úshin mártebe. Sondyqtan Kvırınalede Sizdi resmı saparyńyz kezinde kórip otyrǵanyma qýanyshtymyn», - dedi Italııa Prezıdenti.
Teleborsa.it-diń jazýynsha, Premer-Mınıstr Djordja Melonıdiń QR Prezıdenti Qasym-Jomart Toqaevpen «Kıdjı» saraıyna kezdesýi elder arasyndaǵy seriktestiktiń strategııalyq qundylyǵy men qarym-qatynasynyń tamasha deńgeıin rastaıdy. Ózara múddege saı birqatar strategııalyq sektorlardy qamtıtyn mańyzdy ózara túsinistik týraly memorandýmdarmen almasý jáne birlesken deklaratsııany qabyldaý ózara qyzyǵýshylyq týdyratyn barlyq sektordaǵy baılanystardy ártaraptandyrýǵa jáne tereńdetýge umtylysty kórsetip otyr.
Maqalada aıtylǵandaı, Qazaqstan ıtalııalyq eksport (2023 jyldyń alǵashqy 10 aıynda +31,1%) úshin qarqyndy damyp kele jatqan naryqqa aınalyp keledi. Bul rette, sán sektoryndaǵy (toqyma jáne kıim, zergerlik buıymdar, óner týyndylary men bylǵary) satylymda, sondaı-aq aǵashtan jasalǵan zattar men elektr qurylǵylar ári metall zattary boıynsha saýdada ilgerileý baıqaldy.
Basylym Memleket basshysynyń Rımge saparyna oraı CDP men «Samuryq-Qazyna» AQ arasynda kelisimge qol qoıylǵanyn erekshe atap ótti. Bul turǵyda ıtalııalyq jáne qazaqstandyq kompanııalar arasyndaǵy yntymaqtastyqty ilgeriletý, turaqty ósý jobalaryn yntalandyrý jáne Italııa men Qazaqstandaǵy áleýetti ınvestıtsııalyq múmkindikterdi anyqtaý eskerilgen. Atap aıtqanda, Cassa Depositi e Prestiti bas dırektory Darıo Skannapıeko men «Samuryq-Qazyna» AQ Basqarma tóraǵasy Nurlan Jaqypov qol qoıǵan yntymaqtastyq týraly kelisimniń negizgi tarmaqtarynda osy máseleler qamtyldy.
CDP men «Samuryq-Qazyna» qory arasyndaǵy yntymaqtastyq týraly kelisim eki jylǵa arnalǵan jáne ol óńdeý ónerkásibi, energetıkalyq ári logıstıka sektorlaryna baǵyttalǵan. Qujat CDP tobynyń kompanııalary men «Samuryq-Qazyna» qorynyń yntymaqtastyǵyn nyǵaıtýdy, sondaı-aq eki eldiń ınvestıtsııalyq múmkindikterin ilgeriletýdi qarastyryp otyr.
Teleborsa.it Syrtqy ister jáne halyqaralyq yntymaqtastyq mınıstrligi uıymdastyrǵan ıtalııalyq-qazaqstandyq dóńgelek ústel otyrysy aıasynda SACE pen KazakhExport, sondaı-aq Qazaqstannyń Damý Banki (QDB) arasynda ózara túsinistik týraly eki memorandýmǵa qol qoıylǵanyn jazǵan. Qujattar ıtalııalyq jáne qazaqstandyq kompanııalar arasyndaǵy seriktestikti nyǵaıtýǵa, Qazaqstandaǵy Made in Italy ónimderiniń sanyn arttyrýǵa baǵyttalǵan.
Atap aıtqanda, KazakhExport-pen qol qoıylǵan alǵashqy ózara túsinistik týraly memorandým Italııa men Qazaqstan arasyndaǵy kommertsııalyq qarym-qatynastardy damytýǵa, Ortalyq Azııada jumys isteýge múddeli ıtalııalyq kompanııalardyń jáne Italııanyń naryǵyna shyǵýǵa múddeli qazaqstandyq kompanııalardyń bıznesin yntalandyrýǵa arnalǵan.
Sondaı-aq qujat jańa saqtandyrý ári qarjylyq tetikterdi ázirleýde jáne qoldanystaǵy bıznes baǵyttaryn ilgeriletýde SACE jaǵynan KazhakExport-qa qoldaý kórsetýdi qarastyrady.
QDB-men jasalǵan ekinshi memorandým energetıka, metallýrgııa, taý-ken ónerkásibi, kólik, mashına jasaý jáne azyq-túlik sııaqty basym sektorlardaǵy jańa bıznes múmkindikterin anyqtaý arqyly eki el arasyndaǵy kommertsııalyq qarym-qatynastardy nyǵaıtýǵa baǵyttalǵan. Sonymen qatar, osy kelisim boıynsha taraptar ıtalııalyq jáne qazaqstandyq áriptesterdiń qatysýymen Business Matching is-sharalaryn uıymdastyrýǵa mindetteldi.
Munymen qosa, Qazaqstan Respýblıkasy Prezıdentiniń Italııaǵa sapary aıasynda ıtalııalyq SIMEST kompanııasy «Kazakh Invest» ulttyq ınvestıtsııalyq kompanııasymen yntymaqtastyq týraly kelisimge qol qoıdy. Kelisim aıasynda taraptar saýda qatynastaryn odan ári damytý jáne ózara ınvestıtsııanyń jalpy kólemin ulǵaıtý maqsatynda ekijaqty baılanysty yntalandyrýǵa ýaǵdalasty.
Teleborsa.it jazǵandaı, Kazakh Invest-pen jasalǵan kelisim Italııa men Qazaqstan arasyndaǵy saýda-ónerkásiptik qarym-qatynastardy damytý úshin mańyzdy múmkindik bolady.
