Qazaqstan Prezıdentiniń Reseıge memlekettik sapary halyqaralyq aýqymdaǵy oqıǵa — Lavrov
ASTANA. KAZINFORM — Qazaqstan Prezıdenti Qasym-Jomart Toqaevtyń qarasha aıyndaǵy Reseıge memlekettik saparyna daıyndyq tolyqtaı júrgizilip jatyr. Sapar shyn máninde halyqaralyq aýqymdaǵy oqıǵaǵa aınalmaq. Bul jaıynda Qazaqstannyń Syrtqy ister mınıstri Ermek Kósherbaevpen kezdesý barysynda reseılik áriptesi Sergeı Lavrov aıtty.
Ermek Kósherbaev RF Syrtqy ister mınıstri Sergeı Lavrovpen kezdesý barysynda mınıstr bolyp taǵaıyndalǵannan keıingi Reseıge birinshi resmı saparyna aıryqsha mán beretindigin málimdedi.
— Bul sapardyń aıryqsha máni bar. Óıtkeni, taǵaıyndaýdan keıingi birinshi resmı saparym sanalady. Qazaqstannyń Elshisi retinde Máskeýde jumys istegen kezeńde qalyptasqan jeke baılanystardy jandandyrý múmkindigin eki ese baǵalaımyn, — dedi Ermek Kósherbaev.
Sonymen qatar ol bul kúni eki el arasyndaǵy dıplomatııalyq qarym-qatynastyń ornaýyna 33 tolýynyń nyshandyq máni bar ekenin atap ótti.
Ermek Kósherbaev Reseı SІM ókilderimen jáne memlekettik organdar basshylarymen qalyptasqan senim men dostyqqa negizdelgen qarym-qatynastyń saqtalatynyna úmit artatyndyǵyn aıtty. Onyń aıtýynsha, bul jaıt eki eldiń arasyndaǵy syndarly dıalogtyń odan ary damýyna septigin tıgizedi.
Al Reseı syrtqy saıasat vedomstvosynyń basshysy Sergeı Lavrov Qazaqstan Prezıdenti Qasym-Jomart Toqaevtyń qarashadaǵy memlekettik saparyna daıyndyq qarqyndy júrip jatqanyn atap ótti.
— Qazaqstan Prezıdenti Qasym-Jomart Toqaevtyń Reseı Federatsııasyna memlekettik saparyna daıyndyq tolyqqandy júrgizilip jatyr. Onyń shyn máninde halyqaralyq aýqymdaǵy oqıǵaǵa aınalatyndyǵyn asyra silteýsiz qoryqpaı aıta alamyn, — dedi Lavrov.
Sondaı-aq ol Reseı men Qazaqstan basshylarynyń únemi baılanysta ekenin, osy jyldyń basynan beri joǵary deńgeıde 4 kezdesý ótkenin aıtty.
RF SІM basshysynyń aıtýynsha, «elder arasynda naqty ózara tıimdi jáne praktıkalyq yntymaqtastyq júrgizilmegen memlekettik te, adamı da qyzmettiń, onyń ishinde syrtqy saıasat vedomstvo jelisi arqyly da birde-bir sala joq».
Almatyda ótken Qazaqstan-Reseı medıaforýmynda RF Prezıdentiniń baspasóz hatshysy Dmıtrıı Peskov ta qarasha aıyna josparlanǵan Qazaqstan Respýblıkasy Prezıdentiniń Reseı Federatsııasyna birinshi memlekettik saparyna daıyndyq qyzý júrip jatqanyn aıtqan edi.