Qazaqstan Prezıdentiniń Reseıge eki kúndik jumys sapary qalaı ótti
Prezıdent Qasym-Jomart Toqaevtyń Reseı Federatsııasyna eki kúndik jumys sapary aıaqtaldy. Kazinform bul týraly Aqordaǵa silteme jasap habarlaıdy.
Memleket basshysy 25 jeltoqsan kúni Reseı Prezıdenti Vladımır Pýtınniń shaqyrýymen Sankt-Peterbýrg qalasyna bardy.
Joǵary Eýrazııalyq ekonomıkalyq keńes (JEEK) otyrysy ótetin B.N.Eltsın atyndaǵy prezıdenttik kitaphanada Qasym-Jomart Toqaevty RF basshysy V.Pýtın qarsy aldy.
QR Prezıdenti Reseı Prezıdenti – JEEK tóraǵasy Vladımır Pýtın, Armenııa Premer-mınıstri Nıkol Pashınıan, Belarýs Prezıdenti Aleksandr Lýkashenko, Qyrǵyzstan Prezıdenti Sadyr Japarov, sondaı-aq Eýrazııalyq ekonomıkalyq komıssııa alqasynyń tóraǵasy Mıhaıl Mıasnıkovıchpen birge JEEK-tiń shaǵyn quramdaǵy otyrysyna qatysty.
Keıin Memleket basshysy JEEK-tiń keńeıtilgen quramdaǵy otyrysyna qatysyp, osy jyldyń ońaı bolmaǵanyn, ásirese, jahandy jaılaǵan turaqsyzdyqtyń kúsheıe túskenin atap ótti. Sondaı-aq Memleket basshysy Reseıdiń Uıymǵa tóraǵalyǵy tabysty aıaqtalýymen Vladımır Pýtındi quttyqtady. Sondaı-aq Nıkol Pashınıanǵa Armenııanyń 2024 jyly Eýrazııalyq ekonomıkalyq odaq organdaryna nátıjeli tóraǵalyq etýine tilektestik bildirdi.
Budan bólek, Qazaqstan Prezıdenti TMD-ǵa múshe memleketter basshylarynyń beıresmı kezdesýine qatysty. Jıyn barysynda TMD elderiniń kóshbasshylary Uıym qyzmetiniń basym baǵyttaryn, ózara tıimdi yntymaqtastyqty nyǵaıtý jáne odan ári damytý josparyn talqylady. Sondaı-aq TMD aıasyndaǵy yqpaldastyqtyń ózekti máseleleri jóninde pikir almasty.
Qasym-Jomart Toqaev Reseı Federatsııasyna jumys sapary barysynda, sonymen qatar Reseı Prezıdenti Vladımır Pýtın, Ázerbaıjan Prezıdenti Ilham Álıev, Armenııa Premer-mınıstri Nıkol Pashınıan, Belarýs Prezıdenti Aleksandr Lýkashenko, Qyrǵyzstan Prezıdenti Sadyr Japarov, Tájikstan Prezıdenti Emomalı Rahmon, Túrikmenstan Prezıdenti Serdar Berdimuhamedov jáne Ózbekstan Prezıdenti Shavkat Mırzıeevpen birge Sankt-Peterbýrg qalasyndaǵy mádenı nysandardy aralap kórdi.
