Qazaqstan Prezıdentiniń bastamalary yqshamdy memlekettik apparat qalyptastyrýǵa baǵyttalǵan - sarapshy

TAShKENT. KAZINFORM – Qazaqstan Prezıdenti Qasym-Jomart Toqaevtyń bastamalary yqshamdy, ashyq jáne esep beretin memlekettik apparat qalyptastyrýǵa baǵyttalǵan, dep habarlaıdy Kazinform agenttiginiń menshikti tilshisi.

Memleket basshysynyń «Turkistan» gazetine bergen suhbaty men V Ulttyq Quryltaıda kótergen bastamalaryna qatysty Ózbekstannyń Strategııalyq jáne óńiraralyq zertteýler ınstıtýty dırektorynyń birinshi orynbasary Akramjon Nematov osyndaı pikir bildirdi.

- Qazaqstan Prezıdenti usynǵan memlekettik basqarý men saıası júıeni jańǵyrtý modeli mańyzdy úsh qaǵıdaǵa negizdelgen. Birinshisi – «Adal azamat» tujyrymdamasy arqyly qoǵamdyq sanany ózgertý. Bul – jaýapkershiligi joǵary, zań talaptaryn qatań saqtaıtyn jáne eldiń damýy jolynda adal qyzmet etetin adamnyń beınesi. Meniń oıymsha, atalǵan bastama sanaǵa serpilis jasaý úshin beıqamdyq ustanymnan arylyp, belsendi qoǵamdyq ıdeıaǵa uıysýǵa jol ashady. Munda ár adam áleýmettik-ekonomıkalyq úrdisterdiń sýbektisine aınalady. Memleket jáne qoǵam arasyndaǵy senim jeke jaýapkershilik pen kelisim arqyly qalyptasady, - dedi sarapshy.

Akramjon Nematov atap ótkendeı, Memleket basshysy usynǵan ekinshi mańyzdy bastama - saıası ınstıtýtsıonaldyq jańǵyrý. Ol Konstıtýtsııalyq reforma arqyly júzege asady.

- Meniń pikirimshe, bul bastama yqshamdy, ashyq jáne esep beretin memlekettik apparatty qalyptastyrýǵa baǵyttalǵan. Protsesterdi tsıfrlandyrý, naqty nátıjege baǵdarlaý, memlekettik basqarý sapasyn arttyrý eldegi josparlanǵan reformalardy tıimdi iske asyrýǵa múmkindik beredi. Kúshti ári yqpaldy ınstıtýttardy qalyptastyrmaı, ekonomıkalyq ilgerileý bolmaıtyny belgili, - dep toqtaldy ol.

Sarapshynyń paıymynsha, úshinshi negizgi qadam – ol ekonomıkalyq transformatsııa. Shıkizat eksportyna táýeldilikten arylyp, daıyn taýar shyǵarýǵa kóshý - turaqty ósimdi qamtamasyz etetin basty alǵyshart.

- Qazirgi syn-qaterler Ortalyq Azııa elderiniń barlyǵyna tán. Atap aıtqanda, bul - shıkizatqa táýeldilik, tehnologııalyq damýdyń tómen qarqyny, demografııalyq ahýal, eńbek naryǵyna shamadan tys túsip jatqan júkteme jáne klımattyq ózgerister. Bul rette máseleni teń saıamı jańǵyrý arqyly sheshý múmkin emes. Sondyqtan aımaqtyq deńgeıde memleketterdiń ulttyq strategııalaryn ózara úılestirý óte mańyzdy. Bizdiń óńirdiń áleýeti mol. Máselen, biz Qazaqstannyń qol jetkizgen makroekonomıkalyq kórsetkishterine qýanyshtymyz. Tuńǵysh ret ishki jalpy ónim 300 mlrd dollardan asyp, onyń jan basyna shaqqandaǵy úlesi 15 myń dollarǵa teńeldi. Bul óte úlken kórsetkish, - dep málim etti Akramjon Nematov.

Spıkerdiń oıy Qazaqstandaǵy saıası ózgerister men reformalar tutas Ortalyq Azııa aımaǵyna áser etedi degenge saıady. Tısinshe, bul baǵytta resmı Astana men Tashkenttiń tyǵyz yntymaqtastyǵy óńirdegi ornyqty ekonomıkalyq ósimdi qamtamasyz etedi.

- Eger biz kúsh-jigerimizdi júıeli biriktirsek, onda Ortalyq Azııa úsh negizgi nátıjege qol jetkizedi. Birinshiden, óńir geosaıasat obektisi mártebesinen oıysyp, táýelsiz kúsh ortalyǵyna aınalady. Ekinshiden, ınvestıtsııalyq tartymdylyq artady. Úshinshiden, ishki óndiris, tehnologııa jáne adamı kapıtaldy damytý esebinen syrtqy syn-qaterlerge táýeldilik tómendeıdi. Birlese jańǵyrý - bul Ortalyq Azııa úshin tek saıası tańdaý emes, sondaı-aq ol ıntegratsııaǵa bastaıtyn jalǵyz jol, - dedi sarapshy.

Qorytyndylaı kele, Akramjon Nematov Ózbekstannyń Strategııalyq jáne óńiraralyq zertteýler ınstıtýty qazaqstandyq áriptesterimen tyǵyz baılanysta ekenine toqtaldy.

- Biz quramyna Strategııalyq jáne óńiraralyq zertteýler ınstıtýty men Qazaqstannyń strategııalyq zertteýler ınstıtýtynyń ókilderi engen sarapshylar keńesin qurdyq. Bıyl onyń alǵashqy otyrysyn Tashkentte ótkizýdi josparlap otyrmyz. Onyń barysynda sarapshylar qazaq-ózbek qarym-qatynasyn damytý, yntymaqtastyqty nyǵaıtý, baılanystardy bekemdeı túsý boıynsha pikir almasyp, tıisti usynystar ázirleıdi, - dep túıindedi Akramjon Nematov.

Buǵan deıin habarlaǵanymyzdaı, osy aptada Prezıdentke Konstıtýtsııanyń qorytyndy mátini usynylýy múmkin.