Qazaqstan Prezıdentiniń atyna Respýblıka kúnine oraı quttyqtaý jedelhattary túsip jatyr
Qasym-Jomart Toqaevtyń atyna ulttyq mereke – Respýblıka kúnine oraı shet memleketterdiń basshylary men halyqaralyq uıymdardyń jetekshilerinen quttyqtaý hattary kelip jatyr, dep habarlaıdy Kazinform Aqordaǵa silteme jasap.
Reseı Prezıdenti Vladımır Pýtın Memleket basshysyn Respýblıka kúnimen quttyqtap, elimizge tabys pen baq-bereke tiledi.
«Sizdiń elińiz áleýmettik-ekonomıkalyq damý jolymen senimdi túrde ilgerilep keledi. Sondaı-aq mańyzdy halyqaralyq máselelerdi sheshýde óziniń eleýli úlesin qosyp, álemdik arenada zor bedelge ıe bolyp otyr. Reseı men Qazaqstan qatynastary joǵary deńgeıde damyp keledi. Strategııalyq seriktestik pen odaqtastyq baılanystardy odan ári nyǵaıtý, TMD, Eýrazııalyq ekonomıkalyq odaq, UQShU jáne ShYU sekildi uıymdar aıasyndaǵy syndarly yqpaldastyqty keńeıtý halyqtarymyzdyń túpki múddesine saı keledi», – delingen jedelhatta.
Qytaı Halyq Respýblıkasynyń Tóraǵasy Sı Tszınpın Qasym-Jomart Toqaevqa jáne dostas Qazaqstan halqyna óziniń júrekjardy lebizi men izgi tilegin joldady. Ol sońǵy jyldary Qazaqstanda turaqty ekonomıkalyq damý baıqalatynyn, elimizdiń óńirlik jáne halyqaralyq isterde yqpaly kúsheıip kele jatqanyn atap ótti.
«Ózińiz bastamashy bolyp, júzege asyryp otyrǵan Jańa Qazaqstan qurý ıdeıasy zor jetistikke jetetinine senimdimin. Sizben birge máńgilik jáne jan-jaqty strategııalyq seriktestikke negizdelgen qytaı-qazaq qarym-qatynastaryn jańa deńgeıge kóterý úshin kúsh salýǵa daıynmyn», – dep jazdy QHR Tóraǵasy.
Amerıka Qurama Shtattarynyń Prezıdenti Djozef Baıden Qasym-Jomart Toqaev pen Qazaqstan halqyna joldaǵan óziniń quttyqtaýynda eki el arasyndaǵy yntymaqtastyqty joǵary baǵalaǵan.
«Qazaqstan men AQSh-ty egemendikti, táýelsizdikti jáne aýmaqtyq tutastyqty saqtaý jolyndaǵy ortaq múddege negizdelgen seriktestik biriktiredi. Otyz jyldan astam ýaqyt boıy biz osy qaǵıdattardy saqtap, halyqtarymyzdyń jarqyn bolashaǵyn qalyptastyrý úshin birge áreket etip kelemiz. Sońǵy jyldary strategııalyq seriktestikti nyǵaıtýǵa jáne barlyq saladaǵy yntymaqtastyqty keńeıtýge baǵyttalǵan jumys júrgizdik. Men elderimiz arasyndaǵy baılanystardy odan ári tereńdetýge nıettimin», – dep jazylǵan Prezıdent Baıdenniń quttyqtaý jedelhatynda.
Ulybrıtanııa men Soltústik Irlandııa Birikken Koroldiginiń Koroli III Charlz Qazaqstanmen aradaǵy dostyq qatynastar jáne ekijaqty seriktestik odan ári nyǵaıa beretinine senim bildirdi.
Frantsııa Prezıdenti Emmanıýel Makron óziniń quttyqtaýynda uzaq jyldar boıǵy ekijaqty strategııalyq yntymaqtastyqty damytýdyń mańyzdy ekenin atap ótti.
«Elderimiz arasyndaǵy qarym-qatynasty odan ári nyǵaıtý, energetıka, sý resýrstary, aýyl sharýashylyǵy, densaýlyq saqtaý jáne shıkizat salalaryndaǵy seriktestikti damytý úshin Qazaqstanǵa jasaıtyn aldaǵy saparymdy asyǵa kútemin», – delingen jedelhatta.
Ózbekstan Prezıdenti Shavkat Mırzıeev óz quttyqtaýynda Qasym-Jomart Toqaevtyń basshylyǵymen júrgizilip jatqan aýqymdy jáne júıeli reformalardyń nátıjesinde zamanaýı Qazaqstan turaqty damyp kele jatqanyn, al onyń óńirlik jáne jahandyq deńgeıdegi ózekti bastamalaryn halyqaralyq qoǵamdastyq laıyqty moıyndaıtynyn atap ótken.
Qyrǵyzstan Prezıdenti Sadyr Japarov Memleket basshysy Qasym-Jomart Toqaevtyń Ádiletti Qazaqstandy qurý jónindegi bastamasyn qazaq halqy udaıy qoldaıtynyn aıtqan. Sonymen qatar ol odaqtastyq qatynastardyń qazirgi oń dınamıkasy ekijaqty yntymaqtastyqty damytý baǵytynda aýqymdy jospar qurýǵa múmkindik beretinin jetkizgen.
Tájikstan Prezıdenti Emomalı Rahmon Qazaqstannyń saıası, áleýmettik-ekonomıkalyq, mádenı-gýmanıtarlyq jáne qoǵam ómiriniń basqa da salalarynda qol jetkizgen tolaıym tabystaryn joǵary baǵalady.
Túrikmenstan Prezıdenti Serdar Berdimuhamedov pen Túrikmenstan Halk Maslahatynyń Tóraǵasy Gýrbangýly Berdimuhamedov tatý kórshilik, ózara qurmet pen senim qaǵıdattaryna negizdelgen ekijaqty qarym-qatynasqa erekshe nazar aýdarǵan.
Ázerbaıjan Prezıdenti Ilham Álıev óz jedelhatynda baýyrlastyq pen ózara senimge negizdelgen tarıhı tamyry tereń ázerbaıjan-qazaq qarym-qatynasyn jan-jaqty damytýǵa basa mán beretinin jazǵan.
Belarýs Prezıdenti Aleksandr Lýkashenko quttyqtaý hatynda Qazaqstannyń egemendik pen aýmaqtyq tutastyqty nyǵaıtý úshin júzege asyryp jatqan sharalaryn, ekonomıka men áleýmettik salalardaǵy qolǵa alǵan aýqymdy ózgeristerin, kópultty memlekettiń ishki jáne syrtqy saıasatta syndarly yntymaqtastyq ornatýǵa baǵyttalǵan kúsh-jigerin joǵary baǵalaǵan.
Sonymen qatar ózderiniń quttyqtaýlaryn Saýd Arabııasynyń Koroli Salman ben Ábdelazız Ál Saýd, Saýd Arabııasy Koroliniń Taq murageri – Mınıstrler keńesiniń tóraǵasy Muhammed ben Salman ben Ábdelazız Ál Saýd, Rım Papasy Frantsısk, Japonııa Imperatory Narýhıto, Marokko Koroli VI Muhammed, Oman Sultany Haısam ben Tarıq Ál Saıd, Ispanııa Koroli VI Felıpe, Nıderlandy Koroli Vıllem-Aleksandr, Shvetsııa Koroli Karl Gýstav, Úndistan Prezıdenti Draýpadı Mýrmý, Ońtústik Koreıa Prezıdenti ıÝn Sok El, Sıngapýr Prezıdenti Tarman Shanmýgaratnam, Armenııa Prezıdenti Vaagn Hachatýrıan, Armenııa Premer-mınıstri Nıkol Pashınıan, Italııa Prezıdenti Serdjo Mattarella, Bolgarııa Prezıdenti Rýmen Radev, Grekııa Prezıdenti Katerına Sakellaropýlý, Horvatııa Prezıdenti Zoran Mılanovıch, Portýgalııa Prezıdenti Marselý Rebelý de Soýza, Rýmynııa Prezıdenti Klaýs Iohannıs, Shveıtsarııa Prezıdenti Alen Berse, Latvııa Prezıdenti Edgars Rınkevıchs, Polsha Prezıdenti Andjeı Dýda, Fınlıandııa Prezıdenti Saýlı Nıınıste, BUU Bas hatshysy Antonıý Gýterrısh, Aýstralııa General-gýbernatory Devıd Herlı, Tatarstan Raısy Rýstam Mınnıhanov, Mıanma shtaty Ákimshilik keńesiniń tóraǵasy Mın Aýn Hlaın, TMD Bas hatshysy Sergeı Lebedev, EQYU Bas hatshysy Helga Marııa Shmıd, ISESKO Bas dırektory Salım ben Muhammed ál-Malık jáne basqalar joldady.
Quttyqtaý jedelhattary áli de kelip túsip jatyr.
