Qazaqstan Prezıdentiniń atyna Naýryz merekesine oraı quttyqtaý jedelhattary keldi
ASTANA. KAZINFORM – Qasym-Jomart Toqaevtyń atyna shet memleketter basshylary men halyqaralyq uıymdardyń jetekshilerinen quttyqtaý jedelhattary kelip jatyr. Bul týraly Aqordanyń baspasóz qyzmeti habarlady.
Reseı Prezıdenti Vladımır Pýtın jedelhatynda eki el arasyndaǵy yqpaldastyqtyń joǵary deńgeıin atap ótken.
– Reseı men Qazaqstan arasyndaǵy qarym-qatynas jan-jaqty strategııalyq seriktestik pen odaqtastyq sıpatyna ıe. Bul baılanystar qos halyqtyń ıgiligi úshin jáne Eýrazııa keńistigindegi qaýipsizdik pen turaqtylyqty nyǵaıtý múddesine saı aldaǵy ýaqytta dáıekti túrde damı túsetinine kámil senemin, – delingen jedelhatta.
QHR Tóraǵasy Sı Tszınpın Memleket basshysy men qazaqstandyqtardy Ulystyń uly kúnimen quttyqtap, Prezıdent Qasym-Jomart Toqaevtyń denine saýlyq, eńbegine tabys tiledi.
– Byltyr Sizben eki márte kezdestik. Biz ekijaqty qarym-qatynas pen túrli saladaǵy yntymaqtastyqty damytý jóninde mańyzdy ýaǵdalastyqtarǵa qol jetkizip, Qytaı men Qazaqstan arasyndaǵy jan-jaqty ári máńgi strategııalyq seriktestiktiń jańa damý kezeńine jedel qadam bastyq. Men ózara saıası senimdi tereńdetýge, san qyrly yqpaldastyqty nyǵaıtýǵa jáne taǵdyry ortaq Qytaı-Qazaqstan qoǵamdastyǵyn odan ári damytýǵa ári iske asyrýǵa Sizben birge kúsh jumyldyrýǵa ázirmin, – dep jazdy Qytaı kóshbasshysy.
Ózbekstan Prezıdenti Shavkat Mırzıeev erte zamannan kele jatqan mereke eki el arasyndaǵy baılanystardy keńeıtýge yqpal etip, ózbek-qazaq halyqtarynyń turmys-tirshiligindegi aıtýly kún dep sanaıdy.
– Joǵary deńgeıdegi dıalogty jandandyrýdyń jáne birlesken kúsh-jigerdiń arqasynda Ózbekstan men Qazaqstan arasyndaǵy ózara qurmet pen qoldaýǵa negizdelgen strategııalyq qarym-qatynas pen odaqtastyq joǵary sapaly deńgeıge kóterildi. Aldaǵy ýaqytta da osy baǵyttan aınymaımyz dep senemin, – delingen jedelhatta.
Qyrǵyzstan Prezıdenti Sadyr Japarov Qasym-Jomart Toqaevtyń asa jaýapty memlekettik qyzmetine tabys, al baýyrlas Qazaqstan halqyna beıbitshilik pen órkendeý tiledi.
– Bizdiń ozyq mádenıetimiz ben ıgi dástúrlerimizdi ulyqtaıtyn osynaý kóktem merekesi halyqtarymyzdyń dostyǵyn bekemdep, qut-bereke ákelsin, – dep jazǵan Qyrǵyz Prezıdenti.
Tájikstan Prezıdenti Emomalı Rahmon Memleket basshysy men baýyrlas Qazaqstan halqyna jyly lebizin joldady.
– Kóneden kele jatqan meıramnyń izgi dástúrleri Tájikstan men Qazaqstan arasyndaǵy dostyq qarym-qatynasty, strategııalyq seriktestik pen odaqtastyqty nyǵaıtyp, qos halyqtyń ıgiligi úshin jańa mazmunmen baıı beredi dep oılaımyn, – dedi Tájikstan basshysy.
Túrikmenstan Prezıdenti Serdar Berdimuhamedov Naýryz merekesine oraı aqjarma tilegin jetkizdi.
– Adamzattyń baı mádenı murasynyń ajyramas bir bóligi sanalatyn, sondaı-aq izgilikti nasıhattaıtyn naýryz merekesi halyqtar arasyndaǵy dostyq pen birlikti kúsheıte túsedi. Atalǵan aıryqsha mereke Sizge jáne halqyńyzǵa baqyt, qýanysh pen tabys syılasyn, – dedi Serdar Berdimuhamedov.
Memleket basshysyn sonymen qatar Ázerbaıjan Prezıdenti Ilham Álıev, Belarýs Prezıdenti Aleksandr Lýkashenko, Iran Prezıdenti Masýd Pezeshkıan, Pákistan Premer-mınıstri Shahbaz Sharıf, Túrki memleketteri uıymynyń bas hatshysy Kýbanychbek Ómirálıev quttyqtady.
Buǵan deıin Prezıdenttiń Ulystyń uly kúnine arnalǵan kontsertti tamashalaǵanyn jazǵan edik.
