Qazaqstan Prezıdentiniń arnaıy ókili AQSh Memlekettik hatshysymen kelissóz júrgizdi
ASTANA.KAZINFORM - AQSh-qa sapary aıasynda Qazaqstan Prezıdentiniń AQSh-pen ózara is-qımyl jónindegi Arnaıy ókili Erjan Qazyhan men Qazaqstan Respýblıkasy Premer-Mınıstriniń orynbasary Serik Jumanǵarın bastaǵan qazaqstandyq delegatsııa AQSh Memlekettik hatshysy Marko Rýbıomen kezdesti.
Kezdesý barysynda E.Qazyhan Qazaqstan Respýblıkasynyń Prezıdenti Qasym-Jomart Toqaevtyń AQSh Prezıdenti Donald Trampqa joldaǵan sálemin jetkizip, Qazaqstan-Amerıka qatynastarynyń qarqyndy damýyn, ornyqty saıası dıalogty jáne is júzindegi ózara is-qımyldyń keńeıip kele jatqanyn atap ótti.
2025 jylǵy qarashada Aq úıdiń keńsesinde ótken eki el kóshbasshylarynyń kezdesýi qorytyndysy boıynsha qol jetkizilgen ýaǵdalastyqtardyń mańyzdylyǵy, onyń ishinde jalpy kólemi shamamen 20 mlrd. AQSh dollaryn quraıtyn ınvestıtsııalyq jobalardy iske asyrý erekshe atap ótildi.
Arnaıy ókil elimizdiń beıbitshilik pen qaýipsizdikti qamtamasyz etýge baǵyttalǵan halyqaralyq kúsh-jigerdi qoldaýǵa qosqan úlesin, sonyń ishinde Beıbitshilik keńesi sheńberindegi qyzmetti qoldaıtynyn atap ótip, sondaı-aq Avraam kelisimderin iske asyrýdyń óńirlik jáne jahandyq turaqtylyqty nyǵaıtýdyń mańyzdy faktorlarynyń biri retindegi mańyzyn rastady.
Amerıka tarapy Qazaqstanda júrgizilip jatqan memlekettik júıeni jańǵyrtýǵa, bılik ınstıtýttarynyń tıimdiligin arttyrýǵa jáne zań ústemdigin nyǵaıtýǵa baǵyttalǵan aýqymdy saıası jáne áleýmettik-ekonomıkalyq reformalar týraly habardar etildi.
Taraptar saýda-ekonomıkalyq jáne ınvestıtsııalyq yntymaqtastyqty odan ári damytýǵa ózara múddeliligin rastady. Іskerlik baılanystardy jandandyrý jáne birlesken jobalardy iske asyrý Keńeıtilgen strategııalyq seriktestikti odan ári tereńdetý úshin jańa múmkindikter ashatynyna bólek toqtaldy.
E.Qazyhan Memlekettik hatshyny Qazaqstanǵa resmı saparmen kelýge shaqyrýdy rastady.
Óz kezeginde, AQSh Memlekettik hatshysy M.Rýbıo ekijaqty yntymaqtastyqtyń qazirgi deńgeıine joǵary baǵa berip, ony odan ári tereńdetýge daıyn ekenin bildirdi.
Kezdesý qorytyndysy boıynsha taraptar dıalogty jalǵastyrýǵa jáne ekijaqty kún tártibiniń barlyq baǵyttary boıynsha Qazaqstan-Amerıka yntymaqtastyǵyn nyǵaıtýǵa kelisti.
Aıta keteıik, Prezıdent Ókili Vashıngtonda AQSh senatory Stıv Deınsti marapattaǵan bolatyn.
