Qazaqstan Prezıdentiniń aptalyq jumysyna vıdeosholý
Aqorda Prezıdent Qasym-Jomart Toqaevtyń 25 qyrkúıek – 1 qazan aralyǵyndaǵy aptalyq jumysyna vıdeosholý usyndy, dep habarlaıdy QazAqparat.
Memleket basshysy 25 qyrkúıek Qarýly kúshterde kadrlyq aýys-túıis jasady. Atap aıtqanda, Asan Júsipovti QR Qarýly kúshteri Qurlyq áskerleriniń bas qolbasshysy laýazymyna bekitti. Tıisinshe, Talǵat Qoıbaqov QR Qarýly kúshteri Qurlyq áskerleriniń bas qolbasshysy laýazymynan bosatyldy.
Aptanyń alǵashqy kúni QR Prezıdenti Reseı, Belarýs jáne Qyrǵyzstannyń úkimet basshylarymen kezdesti.
Dál sol kúni Qasym-Jomart Toqaev Tatarstan Raısy Rýstam Mınnıhanovty qabyldady.
26 qyrkúıek kúni Memleket basshysy eks-mınıstr Darhan Qydyrálini Senat depýtaty etip taǵaıyndady.
Sol kúni Parlament Senatynyń depýtaty Asqar Orazalyuly Shákirovtiń ókilettigi toqtatyldy.
27 qyrkúıekte Qazaqstan Prezıdenti Túrikmenstan halqyn Táýelsizdik kúnimen quttyqtap, jedelhat joldady.
28 qyrkúıekte Qasym-Jomart Toqaevtyń Germanııaǵa resmı sapary bastaldy.
Prezıdent Germanııa Kantsleri Olaf Sholtstiń vedomstvosyna baryp, betpe-bet formatynda kelissóz júrgizdi.
Kelissózderden keıin tilshilerge bergen baspasóz máslıhatynda Prezıdent Qazaqstannyń Reseımen ekijaqty tarapta jáne tıisti ıntegratsııalyq birlestikter sheńberinde turaqty dostyq qarym-qatynasta ekenin aıtty. Ýkraınadaǵy jaǵdaıǵa qatysty Qazaqstannyń ustanymy jóninde pikir bildirdi. Ózara aıyptaýlardy toqtatyp, iskerlik kelissózder júrgizýge shaqyrdy.
Qazaqstan men Germanııanyń iri jáne orta bıznesteri arasynda mańyzdy kommertsııalyq kelisimder bekitildi.
Memleket basshysy Germanııanyń Federaldyq kantslerimen keńeıtilgen quramda kelissóz júrgizdi.
Budan bólek, Qasym-Jomart Toqaev Ortalyq Azııa memleketteri basshylarynyń Germanııa Prezıdentimen kezdesýine qatysty.
Aıta ketsek, Memleket basshysynyń Germanııaǵa saparyna qatysty QR Prezıdenti janyndaǵy Qazaqstannyń strategııalyq zertteýler ınstıtýty qaýipsizdik bóliminiń basshysy Dáýren Áben Qazaqstan dıplomatııadaǵy medıator róline qaıta oralatynyna boljam jasady. Onyń aıtýynsha, Germanııadaǵy saparynda Prezıdent Qasym-Jomart Toqaev Qazaqstan Reseı-Ýkraına shıelenisin sheshýdiń qandaı da bir jolyn usynyp jatqan elderdiń nemese memleketter tobynyń talpynysyn qoldaıtynyn aıtqan.
Májilis depýtaty Nıkıta Shatalovtyń pikirinshe, QR Prezıdenti Germanııaǵa saparynda parasatty dıplomatııaǵa aıryqsha mán berdi.
Odan bólek, QR Prezıdenti janyndaǵy QSZI Almaty qalasyndaǵy ókildiginiń bas ǵylymı qyzmetkeri Erbolat Seılehanov Q.Toqaevtyń Germanııaǵa sapary yntymaqtastyqqa qýatty serpin beredi degen pikirin bildirdi.
