Qazaqstan Prezıdentiniń Tatarstanǵa sapary jańa jobalarǵa bastama boldy

QAZAN. QazAqparat - Qazaqstan Prezıdentiniń Tatarstanǵa sapary tyǵyz baılanystardy nyǵaıta túsip, jańa jobalardyń iske asyrylýyna muryndyq bolady, deıdi Qazan federaldyq ýnıversıteti optıka jáne nanofotonıka kafedrasynyń dotsenti Sergeı Harıntsev «QazAqparat» HAA tilshisine bergen suhbatynda.

Onyń aıtýynsha, ýnıversıtet organıkalyq termofotovoltaıkany zertteý salasynda Nazarbaev Ýnıversıtetimen yntymaqtastyq jasap keledi.

«Nazarbaev Ýnıversıtetimen yntymaqtastyq ornatqanymyzǵa 4 jyldan asty. Onda organıkalyq kún elementterin sıntezdeýmen aınalysatyn zertteýshiler toby bar. Búgingi tańda kún energııasyn elektr togyna aınaldyratyn polımerler bar. Jaqyn bolashaqta adamdar organıkalyq kún batareıalarymen úılerdi, kıimderdi boıap, organıkalyq termofotovoltaıka tehnologııalarynyń kómegimen elektr togyn al bastaıdy», - deıdi ol.

S. Harıntsev kún batareıalary óte arzan turatynyn aıtady.

«Álem jyldam ózgerip jatyr. Máselen, 15 jyl buryn organıkalyq kún elementteriniń tıimdiligi nebári 2% bolsa, qazir bul kórsetkish 15%-ǵa jetip otyr. Tıimdilik 17-18% bolǵan jaǵdaıda kommertsııalyq betburys bolady. Sondyqtan barlyq elder osy tehnologııalarǵa kúsh salyp jatyr», - deıdi ǵalym.

«Biz de osy salada Qazaqstanmen yntymaqtastyq jasap kelemiz. Nazarbaev Ýnıversıtetiniń ǵalymdarymen birge ekologııalyq energetıka salasyndaǵy jahandyq máseleni sheshim ústindemiz», - deıdi S. Harıntsev.

Ol Qazaqstan Prezıdentiniń Tatarstanǵa sapary týraly aıtty.

«Menińshe, Qazaqstan Prezıdentiniń Tatarstanǵa sapary respýblıkalarymyz jáne eki el joǵary oqý oryndary arasyndaǵy tyǵyz baılanystardy damytady dep oılaımyn. Tek termo fotovoltaıka salasynda ǵana emes, sonymen qatar fızıka men ınjınırıng salalarynyń basqa baǵyttary boıynsha da iri jobalardy iske asyrýǵa muryndyq bolady», - deıdi QFÝ dotsenti.