Qazaqstan Prezıdentiniń Kýbogy ıspandyq fýtbolshylarǵa buıyrdy
ASTANA. QazAqparat - Qazaqstan Respýblıkasy Prezıdenti Kýbogynyń fınaldyq matchynda týrnırdiń eki myqty jasóspirimder quramasy - Grýzııa men Ispanııa komandalary kezdesti.
Grýzınder Santıago Denımen básekelesýge tyrysty. Biraq olar ese bermedi, Lýkı Gýgeshashvılıdiń qapasyna alty ret shabýyl jasady.
Ispandyq fýtbolshylar barlyq kezeńderdi shynaıy jeńispen aıaqtady. Het-trıkti Danıel Vıllanýeva jasady. Ony áriptesi Karlez Perez qaıtalady. Taǵy bir dopty Franchesko Vıllalba kirgizdi. Grýzııa quramasynan kezdesýdiń tek 49-shy mınýtynda Georgıı Arabıdze oınaýyndaǵy aıyp soqqysy ǵana sátti shyqty. Kavkazdyq komanda qaqpashysy tikeleı soqqymen Alehandro Santomanyń qaqpasyn buzyp ótti. Oıyn aıaqtalǵan soń alǵashqy komandalar úshtigi - Ispanııa, Grýzııa, Tájikstan sportshylaryn saltanatty marapattaý rásimi ótti. Qazaqstannyń jasóspirimder komandasy týrnırde óziniń sońǵy oıynynda Tájikstan komandasyna jol berip, tórtinshi orynǵa jaıǵasty: oıynnyń negizgi ýaqyty tepe-teń - 1:1 esebimen aıaqtaldy. Karamatýllo Saıdovtyń golyna qazaqstandyqtar Álibek Qasymovtyń on bir metrlik qashyqtyqtan soqqysymen jaýap berdi. Oıynnyń sońǵy mınýtyna deıin Konstantın Frolovtyń qaramaǵyndaǵylar jeńis golyn soǵýǵa tyrysty, biraq ol úmitteri aqtalmady. Qola júlde ıegerleri penaltı serııasynda aıqyndalyp, tájikter 4:3 esebimen olardy jeńip ketti. Sondaı-aq uıymdastyrý komıteti nomınatsııalar boıynsha úzdik oıynshylardy atady. Sonymen, úzdik qaqpashy dep Tájikstannan Behrýz Haırıev, úzdik qorǵaýshy - Grýzııadan Nıkolozı Kýrshavıshvılı, úzdik jartylaı qorǵaýshy - ıspandyq Franchesko Vıllalba tanyldy. Úzdik shabýyldaýshylar Danıel Vıllanýeva men Georgıı Arabıdze boldy. Sondaı-aq týrnırdiń úzdik oıynshysy Ispanııa quramasynyń kapıtany Alena Karlez atandy. Óz komandasynyń kapıtany quqyǵymen Alena Qazaqstan fýtbol federatsııasynyń vıtse-prezıdenti Seıildi Baıshaqovtyń qolynan týrnırdiń bas júldesin aldy.
