Qazaqstan Prezıdentine qoǵamnyń senimi joǵary deńgeıde- reseılik sarapshylar
ASTANA. 24 naýryz. QazAqparat /Gúlmıra Álıakparova/ - Qazaqstan Prezıdentine qoǵamnyń senimi joǵary deńgeıde.. Bul týraly Postkeńestik keńistikti zertteý jónindegi aqparattyq taldamaly ortalyq pen Eýrazııalyq sarapshylar forýmynyń baıandamasynda aıtylǵan.
Búgin reseılik saıasattanýshy-sarapshylardyń «Qazaqstandaǵy prezıdenttik saılaý, Reseıdiń kózqarasy» taqyrybynda júrgizgen zertteýi Astanada ótken baspasóz máslıhatynda jarııa etildi.
«Qazaqstan Prezıdentine qoǵamnyń senimi joǵary deńgeıde. «Nur Otan» HDP-ny qosa alǵanda basqa saıası ınstıtýttardy da qoǵamdyq qoldaý deńgeıi birshama joǵary, degenmen N.Nazarbaevty qoldaý reıtıngisinen birneshe ese tómen. Osylaısha, halyqtyń 56 paıyzy úkimettiń qyzmetine senedi dep aıtýǵa bolady», - delingen baıandamada.
Sarapshylardyń pikirinshe, eldegi makroekonomıkalyq kórsetkishter turaqty. Sol sııaqty etnosaralyq qatynastar da jetkilikti deńgeıde turaqty dep baǵalanýda.
Baıandama avtorlarynyń sózine qaraǵanda, sońǵy aılardyń ishinde elıtaishilik qarama-qaıshylyqtardyń aýqymy aıtarlyqtaı báseńdedi. «Bul rette, merziminen buryn prezıdenttik saılaýdy ótkizý týraly sheshim, Nursultan Nazarbaevtyń isin jalǵastyrýshy máselesiniń ashyq kúıinde qalyp otyrǵanyna alańdaýshylyq bildirip otyrǵan elıtany «tynyshtandyrdy», - deıdi reseılik saıasattanýshylar.
