Qazaqstan Prezıdenti zorlyq-zombylyq sıpatyndaǵy ekstremızmniń bastapqy sebepterin joıý qajettigin atap ótti
Qazaqstan Prezıdenti zorlyq-zombylyq sıpatyndaǵy ekstremızm beıbitshilik pen qaýipsizdikke tóngen eń eleýli qaterge aınalyp, halyqaralyq terrorızmniń ósýine yqpal etip otyrǵanyn atap kórsetti.
«Bizge jańa álemdik mámile kerek. Memleketter saıası erik-jiger tanytýǵa jáne ortaq qaýipke qarsy kúsh biriktirýge tıis. Bul Ekinshi dúnıejúzilik soǵys kezinde álemniń qolynan keldi. Biz 2001 jylǵy 11 qyrkúıekten keıin birligimizdi pash ettik. 2013 jyly Vashıngton men Máskeýdiń jahandyq jaýapkershiligine kýá boldyq, olar Sırııadaǵy hımııalyq qarýdy joıý boıynsha yntymaqtastyq jóninde ýaǵdalasty. Bıylǵy shilde aıynda Iran ıadrolyq baǵdarlamasy boıynsha taǵdyrsheshti kelisimge qol jetkizildi. Jetekshi derjavalar qazirgi kelispeýshilikterinen joǵary tura bildi. Búgin de olar búkil órkenıetti adamzatqa eleýli qater tóndirip otyrǵan terrorızmge qarsy birige alady dep úmittenemiz», - dedi Memleket basshysy.
Nursultan Nazarbaev elderdiń birlesken kúsh-jigerin jumyldyrǵan jón bolatyn birqatar baǵyttardy atady.
Sonyń ishinde Memleket basshysy terrorızmdi jahandyq qater retinde tanýdyń mańyzdylyǵyn aıtty.
«BUU antıterrorlyq koalıtsııasyn quryp, zorlyq-zombylyq sıpatyndaǵy ekstremızmge jáne terrorıstik qylmysqa qatysy bar adamdardy izdeý, ustaý jáne ekstradıtsııalaý boıynsha biryńǵaı is-qımyl tetigin ázirlegen jón», - dedi Nursultan Nazarbaev.
Qazaqstan Prezıdenti BUU aıasynda zorlyq sıpatyndaǵy ekstremızmge qarsy is-qımyl jasaýǵa baǵyttalǵan barlyq qararlar men sheshimderdiń usynymdyq sıpatynan mindetteý turpatyna kóshý qajettigin de aıtty.
«Olar Qaýipsizdik keńesi deńgeıinde qaralýǵa jáne bekitilýge tıis. BUU-nyń 2006 jyly qabyldanǵan Jahandyq kontrterrorıstik strategııasynyń negizgi erejelerin Qaýipsizdik keńesiniń qararymen bekitken jón», - dedi Memleket basshysy.
Nursultan Nazarbaev álemge terrorıster men ekstremısterge qarsy is-qımyldyń ámbebap jáne barlyq memleketterge mindetti normalary men erejeleri qajettigine nazar aýdardy.
«BUU aıasynda ekstremıstik jáne terrorıstik qurylymdar uǵymyn birizdendirý qajet, olardy álemdik zańnamadan tysqary dep jarııalaý quqyǵyn tek Qaýipsizdik keńesine berý kerek. Terrorıstik uıymdardyń biryńǵaı tizbesin jasaý mańyzdy», - dedi Qazaqstan Prezıdenti.
Memleket basshysy halyqaralyq terrorızmge jáne ekstremızmge qatysy bar tulǵalardy qýdalaý jáne ekstradıtsııalaýdyń ortaq tetigin ázirleýdiń mańyzdylyǵyna toqtaldy.
«Olarǵa qoldaý kórsetkenderge qatysty eń qatań sanktsııalar qoldanylatynyn naqtylap bekitken jón», - dedi Nursultan Nazarbaev.
Qazaqstan Prezıdenti zorlyq-zombylyq sıpatyndaǵy ekstremızmniń saldarymen ǵana kúresip qoımaı, onyń bastapqy sebepterin joıý qajettigin de aıtty.
«Bul oraıda memleketterdiń qandaı elde bolmasyn, memlekettilikti kúıretýge ákeletin kez kelgen kúshtiń konstıtýtsııalyq emes jáne quqyqtyq emes áreketin qoldaýdan túpkilikti bas tartý mańyzdy mánge ıe», - dedi Memleket basshysy.
Sońynda Nursultan Nazarbaev Qazaqstannyń terrorǵa qarsy memleketter koalıtsııasyna on tórt jyl buryn, 11 qyrkúıektegi qasiretten keıin múshe bolǵanyn eske saldy.
«Bıylǵy maýsym aıynyń aıaǵynda Astanada Ortalyq jáne Ońtústik Azııa elderiniń zorlyq-zombylyq sıpatyndaǵy ekstremızmge qarsy is-qımyl jasaý jónindegi óńirlik konferentsııasy ótti. Biz qazir de zorlyq-zombylyq sıpatyndaǵy ekstremızm men halyqaralyq terrorızmdi joıý jónindegi ujymdyq kúsh-jigerdi qoldaıtynymyzdy taǵy da málimdeımiz», - dedi Qazaqstan Prezıdenti.
