Qazaqstan Prezıdenti: Jerge qatysty jalǵan aqparat taratýdy doǵarý kerek
«Elimiz úshin strategııalyq mańyzy bar taǵy bir másele – shekaralas aımaqtardy damytý. Jer – basty baılyǵymyz. Týyńdy tiger toqymdaı jeriń bolmasa, óz memleketiń de bolmaıdy. Babalarymyz bizge ulan-ǵaıyr aýmaqty mıras etti. Ony shashaý shyǵarmaı saqtap, kórkeıtý – bizdiń qasıetti boryshymyz. Osy oraıda, «Jerimiz sheteldikterge satylyp jatyr» degen sóz ara-tura aıtylyp jatady. Bul – jalǵan aqparat», - dedi Memleket basshysy.
Prezıdent elimizde jerge qatysty túbegeıli sheshim áldeqashan qabyldanǵanyn, ol sheshim zańmen birjola bekitilgenin basa aıtty.
«Túrli daqpyrtqa senip, jurtty dúrliktiretin jalǵan aqparat taratýdy doǵarý kerek. Biz babalar amanatyna árdaıym adal bolamyz. Sheteldikterge qazaqtyń bir qarys jerin de, bir ýys topyraǵyn da bermeımiz. Ony kózdiń qarashyǵyndaı saqtaımyz. Shekara mańyndaǵy eldi mekenderdiń ahýaly jerimizdiń tutastyǵyna jáne elimizdiń amandyǵyna tikeleı yqpal etedi. Shyn máninde, bul – strategııalyq mańyzy bar másele. Ókinishke qaraı, shekara shetindegi keıbir eldi mekende halyq sany kúrt azaıyp ketti. Buǵan bir kezdegi aýdandardy biriktirý jónindegi sheshimder de yqpal etkeni sózsiz. Oblystardyń ishki aýmaqtyq-ákimshilik qurylymynda oılanatyn tustar bar. Biz byltyr Abaı, Ulytaý jáne Jetisý oblystaryn qurdyq. Bul sheshim aımaqtardyń damýyna tyń serpin berdi», - dedi Qasym-Jomart Toqaev.
