Qazaqstan Prezıdenti tarıhshy Qoıshyǵara Salǵaraulyn mereıtoıymen quttyqtady
ASTANA. QazAqparat - Búgin L.N.Gýmılev atyndaǵy Eýrazııa ulttyq ýnıversıtetinde professor, «Eýrazııa» ǵylymı zertteý ortalyǵynyń bas ǵylymı qyzmetkeri, Memlekettik syılyqtyń ıegeri, QR Eńbek sińirgen qaıratkeri, túrkolog-ǵalym, jazýshy Qoıshyǵara Salǵaraulynyń 75 jasqa tolýyna baılanysty «Uly Dalanyń tarıhy: túrikter men mońǵoldar» atty dóńgelek ústel ótti.
Jıyn barysynda ýnıversıtet rektory Erlan Sydyqov Q.Salǵaraulyn quttyqtaı kele, QR Prezıdentiniń quttyqtaý sózin oqyp berdi. «Qurmetti Qoıshyǵara Salǵarauly! 75-ke tolǵan mereı jasyńyz qutty bolsyn! Halqymyz ózińizdi belgili jýrnalıst jáne ultymyzdyń kóne tarıhyn zerttep, zerdelep, jıǵan-tergenin oqyrmanyna jetkizýge bar kúsh-jigerin jumsap kele jatqan qalamger retinde jaqsy biledi. Sizdiń shyǵarmalaryńyz tarıh ǵylymyn nasıhattaýǵa, ultymyzdyń ótkenin tanyp, salt-sanasyn qalyptastyryp, damytýǵa qosylǵan úles bolyp tabylady. Eńbegińiz elimizdiń memlekettik syılyǵymen atap ótildi. Qazaqstannyń eńbek sińirgen qaıratkeri qurmetti ataǵyna ıe boldyńyz. Densaýlyǵyńyz zor, otbasyńyz aman-esen bolyp, eńbegińizdiń zeınetin uzaǵynan kóre berińiz!», - delingen Memleket Basshysynyń hatynda.
Osy sózderden keıin, E.Sydyqov tanymal tarıhshyǵa Eýrazııa ulttyq ýnıversıtetiniń eń joǵary marapaty - «Gýmılev» medalin tapsyrdy. «Sizdi qazaq tarıhynyń tamyrshysy dep ózimshe paıymdaımyn. Óıtkeni dál sol qajetti kezde, Qazaqstannyń qıyn-qystaý zamanynda, eshteńege qaramaı, kerekti dúnıelerdi zertteýge boı urdyńyz. Qytaıǵa baryp, qazaq tarıhyna qatysty málimetterdiń barlyǵyn jınap-terip ákelýińiz kádimgideı osy zamannyń jankeshtiligi dep ataýǵa bolady», - deıdi E.Sydyqov. Shara barysynda mereıtoı ıesiniń jaryq kórgen kitaptarynyń kórmesi uıymdastyrylyp, «Uly dalanyń tarıhy: túrikter men mońǵoldar» atty dóńgelek ústelge kelip túsken jáne Q.Salǵaraulynyń eńbekterine baılanysty ǵylymı maqalalar jeke jınaq bolyp jaryq kórmekshi. Aıta keteıik, ǵalym 1997 jyly Qazaqstannyń QHR-daǵy Elshiliginde mádenıet jónindegi keńesshi qyzmetterin atqara júrip, «Sıýńný», «Dýńhý. Gaýchy», «100 qujat», «Tanym tarmaqtary», «Anyqtamalyq» atty kitaptaryn jazdy. «Altyn tamyr», «Kómbe», «Qazaqtyń qıly tarıhy», «Qazaqtar» roman-esse, «Qazaq qazaq bolǵanǵa deıin», «Qazaq qazaq bolǵannan keıin» degen ІІ tomdyq romandary jaryq kórdi. «Qazaqtar» trılogııasy úshin QR Memlekettik syılyǵynyń laýreaty atandy (1996). Qazaqstan Respýblıkasynyń eńbek sińirgen qaıratkeri. Eki ret medalmen jáne Qazaq KSR Joǵarǵy Keńesiniń Qurmet Gramotasymen marapattalǵan.
