Qazaqstan Prezıdenti Pákistan basshylyǵyna kóńil aıtý jedelhatyn joldady

ASTANA. QazAqparat - Qazaqstan Prezıdenti Qasym-Jomart Toqaev Pákistan Prezıdenti Arıf Alvı men Premer-mınıstri Shahbaz Sharıfke kóńil aıtý jedelhatyn joldady, dep habarlaıdy Aqorda.

Memleket basshysy Peshavar qalasyndaǵy meshitte bolǵan lańkestik áreket saldarynan kóptegen adamnyń qaza tapqany jáne zardap shekkeni týraly sýyt habardy tereń kúızelispen qabyl alǵanyn jetkizdi.

«Men pákistandyqtarmen birge barlyq dinge, adamı nanym-senimge qaıshy, aqylǵa syıymsyz osy jantúrshigerlik zorlyq-zombylyq áreketin qatań aıyptaımyn. Terrorızmniń kez kelgen túrine jol berýge jáne ony aqtaýǵa bolmaıdy.

Qazaqstan halqynyń atynan jáne jeke óz atymnan qaza tapqandardyń otbasylaryna qaıǵyryp, kóńil aıtamyn. Sondaı-aq zardap shekkenderdiń tezirek saýyǵyp ketýin tileımin. Osyndaı qaıǵyly sátte biz Pákistan halqymen birgemiz», – dep jazylǵan jedelhatta.

Eske salsaq, Pákistandaǵy jarylystan kóz jumǵandar sany 83 jetti, kóbi polıtseıler.