Qazaqstan Prezıdenti Ózbekstan Ólıı Májilis Senatynyń tóraǵasyn qabyldady
Kezdesý kezinde ekijaqty yntymaqtastyqtyń ózekti máseleleri talqylandy.
Qasym-Jomart Toqaev Tanzıla Narbaevanyń sapary eki eldiń parlamentaralyq baılanystaryn damytyp, memleketter arasyndaǵy qarym-qatynasqa tyń serpin beretinin atap ótti.
– 2018 jyly saýda aınalymy 2,5 mıllıard dollardy qurady. Al bıylǵy 9 aıdyń ózinde ótken jylǵy nátıjeden artyq jetistikke jetip otyrmyz. Soǵan sáıkes, jyl sońynda Qazaqstan men Ózbekstan arasyndaǵy saýda aınalymynyń kólemi de arta túsedi, – dedi Qasym-Jomart Toqaev.
Prezıdent sáýir aıyndaǵy Ózbekstanǵa jasaǵan memlekettik saparynyń nátıjesinde saýda-ekonomıkalyq baılanystardy nyǵaıtyp, ózara saýda aınalymyn birtindep 5 mıllıard dollarǵa deıin arttyrý týraly kelisimge qol jetkizilgenin aıtty.
Memleket basshysy eki el arasyndaǵy kólik-transport baılanystarynyń, sondaı-aq, mádenı-gýmanıtarlyq qarym-qatynastardyń damý barysy joǵary deńgeıde ekenin atap ótti.
– Qazaqstan men Ózbekstan ózara yntymaqtastyqty damytýǵa qyzyǵýshylyq tanytyp qana qoımaı, sonymen qatar, birqatar máseleler boıynsha birin-biri tolyqtyryp otyrady. Sondyqtan bizdiń ózara yqpaldastyǵymyz tabysty bolatyny sózsiz. Onyń ústine, áriptesim, Ózbekstan Prezıdenti Shavkat Mırzıeevpen eki el arasyndaǵy yntymaqtastyqty jan-jaqty damytý úshin belsendi jumys júrgizýge kelistik, – dedi Qasym-Jomart Toqaev.
Tanzıla Narbaeva Qasym-Jomart Toqaevqa qonaqjaılyq tanytqany úshin alǵys aıtyp, Shavkat Mırzıeevtiń sálemin jetkizdi.
– Sizdiń Qazaqstan Prezıdenti laýazymyna saılanýyńyz – buǵan deıingi abyroıly qyzmetińizdiń nátıjesi. Siz tájirıbeli dıplomat, yqpaldy basshy retinde Tuńǵysh Prezıdent Nursultan Nazarbaevtyń Qazaqstannyń memlekettik qaýipsizdigin nyǵaıtý jáne ekonomıkasyn damytýǵa baǵyttalǵan bastamalaryn jalǵastyryp kelesiz, – dedi ózbek saıasatkeri.
Kezdesý sońynda Memleket basshysy Ózbekstan Prezıdentine izgi tilegin joldady.