Qazaqstan Prezıdenti Ortalyq Azııada kólik ınfraqurylymyn damytý máselesin kóterdi
ASTANA. QazAqparat – Búgin elordadaǵy «Ortalyq Azııa-Reseı» sammıtinde Qazaqstan Prezıdenti Qasym-Jomart Toqaev kólik jáne tranzıt salasyndaǵy mańyzdy qadamdardy atady, dep habarlaıdy QazAqparat tilshisi.
Memleket basshysy dástúrli logıstıkalyq tizbekterdegi irkilisterdi aıta kele, bul jaǵdaı óńir elderine kóliktik-tranzıttik áleýetti tolyq paıdalanýdy talap etip otyrǵanyn aıtty.
«Biregeı geografııalyq ornalasýyna baılanysty Ortalyq Azııa álemdegi eń iri naryqtar arasyndaǵy mańyzdy býyn bolyp otyr. Sondyqtan qazirgi kezeńde kúsh-jigerimizdi qoldanystaǵy jáne keleshegi bar kóliktik-tranzıttik baǵyttardy damytýǵa jumyldyrý mańyzdy. Dúnıejúzilik banktiń baǵalaýyna qaraǵanda, Ortalyq Azııadaǵy kólik kommýnıkatsııalarynyń damýy barlyq eldiń jalpy ishki óniminiń 15%-ǵa ósýin qamtamasyz ete alady», - dedi Qasym-Jomart Toqaev.
Osy oraıda Prezıdent saladaǵy kemshilikterdi joıý úshin ınfraqurylymdy jańǵyrtý, ákimshilik rásimderdi jeńildetý, tranzıt úshin qolaıly jaǵdaı jasaý, sondaı-aq biriktirilgen tsıfrlyq logıstıkalyq sheshimderdi engizý mańyzdy ekenin atap ótti.
