Qazaqstan Prezıdenti OA elderi basshylarynyń konsýltatıvtik jumys kezdesýine qatysty
Nursultan Nazarbaev Qyrǵyz Respýblıkasynyń Prezıdenti Sooronbaı Jeenbekovke, Tájikstan Respýblıkasynyń Prezıdenti Emomalı Rahmonǵa, Ózbekstan Respýblıkasynyń Prezıdenti Shavkat Mırzıeevke, sondaı-aq Túrikmenstan Medjlısiniń tóraıymy Akdja Nurberdyevaǵa qoshemet bildirdi.
Memleket basshysy ishkióńirlik máselelerdi sheshý úshin turaqty konsýltatıvtik jumys kezdesýlerin ótkizý bastamasy Ózbekstan Prezıdenti Sh.Mırzıeevke tıesili ekenin atap ótti.
- Týyndaıtyn barlyq máselelerdi biz birlesip sheshe alamyz. Bizdiń kezdesýimiz bárimizge ortaq Naýryz meıramy qarsańynda ótýiniń sımvoldyq máni bar. Qazaqstan kórshilerimen, ásirese, tarıhy, mádenıeti, dúnıetanymy, dúnıeni sezinýi ortaq Ortalyq Azııa elderimen tyǵyz ekonomıkalyq yntymaqtastyq ornatýǵa árdaıym umtylys tanytty, - dedi Nursultan Nazarbaev.
Qazaqstan Prezıdenti Ortalyq Azııa elderiniń áleýetin biriktirýdiń, ishki óńirlik saýdany arttyrýdyń, óńirlik qaýipsizdikti qamtamasyz etýdiń jáne halyqtarymyzdyń jaqyndasýynyń mańyzdylyǵyn atap ótip, joǵary deńgeıdegi osyndaı konsýltatıtvik kezdesýlerdi ótkizýdiń artyqshylyqtaryna toqtaldy.
«Elderimiz arasyndaǵy saıası yntymaqtastyq máselesi boıynsha eleýli jetistikke qol jetkizgenimizdi aıtqym keledi. Biz syrtqy saıasat vedomstvosy basshylary arasynda dıalog ornata aldyq. Nıý-Iorkte Birikken Ulttar Uıymy Qaýipsizdik Keńesiniń otyrysy kezinde sizderdiń syrtqy ister mınıstrlerińizdi kórip, rıza boldym. Osylaısha zor qoldaý kórsettińizder. Biz árdaıym bir-birimizge qoldaý kórsetip júrýimiz kerek», - dedi Nursultan Nazarbaev.
Memleket basshysy Ortalyq Azııa elderiniń barlyq kóshbasshylarynyń erekshe kúsh-jiger tanytqanyn atap ótip, óńir elderi arasyndaǵy ótken jylǵy memleketaralyq yntymaqtastyqty nyǵaıtý úderisine oń baǵa berdi.
Budan bólek, Nursultan Nazarbaev Ortalyq Azııa elderiniń Qazaqstanmen qarym-qatynasty damytý máselesine nazar aýdardy.
«2017 jyly sizderdiń elderińizdiń árqaısysyna jiberilgen Qazaqstan eksporty 35 paıyzǵa jetti. Úkimetaralyq komıssııalardyń otyrystary ótkizilýde. Shekaralarda jańa beketter ashylýda. Pasport tekserý tártibi jeńildetilýde. Jańa joldar men kópirler salynýda. Shekaralarǵa qatysty kelisimder jasalýda. Kólik qatynasy ornatylýda. Jańa áýe reısteri ashylyp, júrdek poıyzdar jóneltilýde», - dedi Qazaqstan Prezıdenti.
Sonymen birge, Memleket basshysy óńirdiń jetekshi derjavalary - Reseı Federatsııasymen jáne Qytaı Halyq Respýblıkasymen baılanystardy odan ári nyǵaıtý qajettigin atap ótti.
Sońynda Nursultan Nazarbaev ótkizilip jatqan kezdesýdiń tabysty bolatynyna, onyń nátıjeleri óńirdegi barlyq halyqtyń ıgiligine qyzmet etetinine senim bildirdi.
Sodan keıin Qyrǵyz Respýblıkasynyń Prezıdenti S.Jeenbekov sóz sóıledi. Ol óńirimizde ózara tıimdi yntymaqtastyq ornatýdyń mańyzdy ekenin atap ótti.
«Búgingi kezdesý bizdiń dostyq jáne tatý kórshilik qarym-qatynastarymyzdy jańǵyrtyp, jandandyra túsedi. Osy basqosý elderimiz ben halyqtarymyzdyń odan ári jaqyndasýyna baǵyttalǵan ortaq umtylystarymyzǵa tyń serpin beredi. Qonaqjaılyq tanytyp, Ortalyq Azııa elderi basshylarynyń kezdesýin uıymdastyrǵany úshin Nursultan Nazarbaevqa rızashylyǵymdy bildiremin», - dedi Qyrǵyz Respýblıkasynyń Prezıdenti.
Tájikstan Respýblıkasynyń Prezıdenti E.Rahmon sóılegen sózinde Ortalyq Azııanyń kólik-tranzıt áleýetin damytý, sý jáne energetıka resýrstaryn tıimdi paıdalaný, mádenıet salasyndaǵy ózara is-qımyl jáne óńirlik qaýipsizdikti nyǵaıtý máselelerine toqtaldy.
«Biz terrorızm, ekstremızm, esirtkiniń zańsyz aınalymy, transulttyq uıymdasqan qylmys, dinı radıkalızm sııaqty qaýipsizdikke tónetin syn-qaterlerge qarsy tıimdi ári jedel áreket etý úshin barlyq tetikterdi paıdalanýymyz kerek. Bul máselelerdi sheshý yqpaldastyǵymyzdyń basym mindeti sanalady. Óıtkeni bir eldegi jaǵdaıdyń ózgerýi búkil óńirdegi ahýalǵa teris yqpal etýi múmkin», - dedi E.Rahmon.
Ózbekstan Respýblıkasynyń Prezıdenti Sh.Mırzıeev saýda-ekonomıkalyq yntymaqtastyqty jáne óńirlik qaýipsizdik pen turaqtylyqty qamtamasyz etý salasynda memleketaralyq yqpaldastyqty damytýdyń mańyzdylyǵyn atap ótti.
«Bizdiń barlyq birlesken is-qımylymyz, jobalarymyz ben baǵdarlamalarymyz ózara senim men qurmetti nyǵaıtyp, halyqtarymyzdyń múddesine saı keletin ári elderimiz tarapynan tolyq qoldaý tabatyn tyǵyz óńirlik yntymaqtastyqty naqty jańa mazmunmen baıyta túsetini sózsiz», - dedi Ózbekstan Prezıdenti.
Túrikmenstan Medjlısiniń tóraıymy A.Nurberdyeva Túrikmenstan Prezıdenti Gýrbangýly Berdimuhamedovtiń jumys kezdesýine qatysýshylarǵa arnalǵan úndeýin oqyp berdi.
- Ortalyq Azııadaǵy jaqyn kórshilermen yntymaqtasý Túrikmenstannyń syrtqy saıası strategııasynyń basymdy aspektileriniń biri bolyp sanalady. Bizdiń el ekijaqty jáne kópjaqty formattaǵy barlyq baǵyttar boıynsha teń quqyly jáne senimdi dıalogty ilgeriletýge jan-jaqty qoldaý bildire otyryp, óńirdegi eldermen aýqymdy yqpaldastyq ornatýdy kózdeıdi.
