Qazaqstan Prezıdenti «Nazarbaev Ýnıversıteti» túlekteriniń saltanatty oqý bitirý rásimine qatysýda
ASTANA. QazAqparat - Búgin Elbasy Nursultan Nazarbaevtyń qatysýymen Nazarbaev Ýnıversıteti túlekteriniń ekinshi saltanatty oqý bitirý rásimi ótip jatyr. Saltanatty sharaǵa stýdentter, olardyń ata-analary, sonymen birge oqytýshy-professorlyq quram, iri kompanııalardyń basshylary men basqa da qonaqtar qatysýda.
Bıyl ýnıversıtetti 622 stýdent bitirip otyr. Olardyń 444-i bakalavrıat baǵdarlamasy boıynsha, al 178-i magıstratýra baǵdarlamasy boıynsha oqýlaryn aıaqtady. Stýdentterdiń eń kóp sanyn Ǵylym jáne tehnologııalar mektebiniń, Injenerııa mektebiniń, Gýmanıtarlyq jáne áleýmettik ǵylymdar mektebiniń, Joǵary bilim berý mektebiniń, Joǵary bıznes mektebiniń jáne Joǵary memlekettik saıasat mektebiniń stýdentteri quraıdy. Suranysqa ıe mamandyqtardyń ishinde elektrlik jáne elektrondyq ınjenerııa, bıologııalyq ǵylymdar, saıasattaný jáne halyqaralyq qatynastar bar.
QR Prezıdentiniń bastamasymen 2010 jyly qurylǵan Nazarbaev ýnıversıteti - otandyq bilim berýdiń flagmany. Ýnıversıtet qurylǵan kezden bastap, 7 mekteptegi stýdentterdiń jalpy sany 3300 adamǵa deıin ósti. Jyl saıyn 70-ten astam bilim berý granttaryna ıe bolady.
Oqýǵa túsý emtıhandarynyń qorytyndysy boıynsha joǵary nátıje alǵan talapkerler stýdenttiń búkil oqý kezeńindegi shyǵystaryn óteıtin memlekettik bilim berý granty aıasynda Ýnıversıtette bilim alady. Magıstranttar men doktoranttardy oqytý da memlekettik bilim berý tapsyrysy aıasynda júzege asyrylady.
