Qazaqstan Prezıdenti Máskeýde Jeńistiń 75 jyldyǵyna arnalǵan sharaǵa qatysady
SOChI. QazAqparat - Qazaqstan Prezıdenti Qasym-Jomart Toqaev 1941-1945 jyldardaǵy soǵystaǵy Jeńistiń 75 jyldyq mereıtoıyna oraı Máskeýde ótetin merekelik sharaǵa qatysady. Bul jaıynda Memleket basshysy Sochıde reseılik áriptesi Vladımır Pýtınmen ekijaqty kezdesý barysynda aıtty, dep habarlaıdy QazAqparat tilshisi.
«Jeńistiń 75 jyldyǵyn merekeleýge shaqyrǵanyńyz úshin rızashylyǵymdy bildiremin. Máskeýde bolýdy josparlap otyrmyn. Bul - bizdiń ortaq merekemiz», - dedi Q.Toqaev.
Memleket basshysy ákesiniń maıdanger bolǵanyn, al aǵasy Tver oblysynyń Rjev aýylyna qarasty Trýbıno aýylyndaǵy baýyrlastar zıratynda jerlengenin aıtty.
«Sol úshin jergilikti bılikke, sonymen qatar Reseı úkimetine de alǵysymdy bildiremin. Jerleý ornynyń barlyǵy da óte jaqsy kútip ustalynǵan», - dedi QR Prezıdenti.
Qasym-Jomart Toqaev taıaýda Ivanov oblysynda soǵys ýaqytynda qaza bolǵan qazaqstandyq 73 jaýynger jerlengen oryn tabylǵanyn eske saldy.
«Biz, árıne Qazaqstanda Uly jeńis úshin janyn pıda etken jaýyngerlerimizdi este saqtaıtyn bolamyz», - dedi Memleket basshysy.
Aıta keteıik, eki eldiń kóshbasshylarynyń kezdesýi «Valdaı» Halyqaralyq pikirtalas klýbynyń XVI jylsaıynǵy otyrysy alańynda ótti.
