Qazaqstan Prezıdenti IYU-nyń bas hatshysymen kezdesti
Áńgime barysynda Memleket basshysy Qazaqstan bul uıymnyń jumysyna tolyqtaı qatysý úshin qajetti barlyq sharalardy qabyldap otyrǵanyn atap ótti.
«Búgingi is-shara asa mańyzdy. Biz sammıttiń nátıjeleri tabysty bolady dep úmittenemiz», - dedi Nursultan Nazarbaev.
Islam yntymaqtastyǵy uıymynyń bas hatshysy Qazaqstan Prezıdentine sammıtti joǵary deńgeıde uıymdastyrǵany úshin rızashylyǵyn bildirdi.
«Qazaqstannyń ıslam álemindegi bedeli zor. Búgingi sammıtke kelgen barlyq delegatsııa ókilderiniń atynan Sizge jáne Qazaqstan halqyna qonaqjaılyq kórsetip, is-sharany joǵary deńgeıde ótkizgenderińiz úshin alǵys aıtamyn», - dedi Bas hatshy.
ıÝsef ben Ahmad ál-Oseımın Islam yntymaqtastyǵy uıymynyń ǵylym jáne tehnologııalar jónindegi sammıti alǵash ret ótkizilip otyrǵanyna toqtaldy.
«Muny tarıhı oqıǵa dep zor senimmen aıtýǵa bolady. 57 ıslam eliniń ókilderi ǵylym men tehnologııa salasyndaǵy ózekti máselelerdi talqylaý úshin bas qosty. Biz uly dinimizdiń jańa qyrlaryn asha túsemiz dep úmittenemin. Ókinishke qaraı, terrorıstik uıymdar álemdegi ıslamnyń bedeline nuqsan keltirýde», - dedi Islam yntymaqtastyǵy uıymynyń bas hatshysy.
Uıym basshysy keń aýqymda tanymal ókilder qatysqan búgingi kezdesý Qazaqstan Prezıdenti bedeliniń arqasynda ótkizilip otyrǵanyn aıtty.
ıÝsef ben Ahmad ál-Oseımın ıslam elderiniń halyqaralyq kún tártibindegi ózekti máseleler jóninde ortaq ustanym qalyptastyrýǵa jáne ıslamdyq emes uıymdarmen syndarly yntymaqtasýǵa baǵyttalǵan Uıymnyń aldaǵy jumys jospary týraly oı bólisti.
Sondaı-aq, Uıym basshysy Qazaqstannyń jańa elordasy - Astananyń ádemiligine tamsanatynyn aıtyp, qalanyń ınvestıtsııalyq tartymdylyǵyna toqtaldy.
Nursultan Nazarbaev ıÝsef ben Ahmad ál-Oseımınniń Islam yntymaqtastyǵy uıymynyń damýyna tyń serpin beretin bilikti basshy ekenin atap ótti.
«Sizdiń qyzmetińizge tabys tileımin, bizdi qoldaıtynyńyzǵa senemin. Qazirgi ýaqytta lańkestik shabýyldardyń kóbisi ıslam elderinde bolýda. Osy oraıda Sizdiń bul zaýalmen birlese kúres júrgizý qajettigi jónindegi sózińiz oryndy», - dedi Memleket basshysy.
Sońynda Qazaqstan Prezıdenti orta ǵasyrlarda negizgi ǵylymı jańalyqtar ıslam áleminde ashylǵanyna erekshe toqtaldy.
«Muny árdaıym este ustap, aıanbaı eńbek etýimiz qajet. Biz ǵylym men tehnologııalarǵa arnalǵan sammıtti Tórtinshi ónerkásip tóńkerisi kezinde tekten-tek ótkizip otyrǵan joqpyz», - dedi Nursultan Nazarbaev.
